Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Il câs da la vôs di muart
– Driin! Driin!
Al jere agns che il telefon tacât intal mûr da l’ostarie nol sunave.
– Driin! Driin!
Un cidinôr al jere plombât di colp inta stanzie. L’ostîr si stave svicinânt ben planc al tramai che al veve sunât, come che al fos une bombe pronte a scupiâ.
– Pronto! – Al veve dit, ma po dopo un moment, al veve za metût jù.
Ducj lu cjalavin.
Al tremave.
– Driin! Driin!
Dute la int da ostarie a si jere metude ator dal telefon. Il sun al veve cjapât alc di nereôs.
Di daûr il Comissari Rocheton si jere fat strade, sburtant no pôc. Rivât in face a l’imprest, al veve tirât sù il ricevidôr.
– Pronto!
– O vevi voie di domandâ… – La vôs di chê altre bande a jere lontane, flape, spaurose.
– Pronto! Cui isal che al cjacare? Pronto!
Po dopo un moment, Il Comissari al veve metût jù il telefon e si jere zirât viers chei da ostarie.
– Al è sucedût un delit. Cualchidun al à clamât par vê il nestri jutori. A jere une femine, cence flât, la vôs flape, il respîr che planc al murive. Difati a devi jessi muarte.
La platee lu cjalave cui voi spalancâts.
– Cemût si podie savê cui che a jere? – al veve dit Spilot, saltant fûr da schirie di oms.
– No sai – al veve rispuindût Rocheton. – Ma o crôt che nol sedi plui nuie ce fâ. Sigûr cualchidun al devi vê cjapât chê puare femine, pestade e salacor aprofitât di jê e dal so cuarp. Po dopo un colp di pistole, o pûr une curtissade inta schene. Par jê, al è restât juste il timp di rivâ al telefon e fâ un numar a câs, il numar da ostarie. Un fîl di vôs che al domande jutori, il fîl da vite che planc si romp dal dut. Muarte!
Ducj a cjalavin Rocheton. L’ostîr al veve tirât fûr un peçot e si suiave las lagrimes.
Intun trat, si è sintût un colp, e la puarte da ostarie si jere sledrosâde.
Impins su la puarte al jere jentrât cualchidun, dut tabarossât. Une siarpe a taponave la muse fin sore i voi. Une scufe, une istriane.
Ducj si jerin voltâts a cjalâ.
– O cirivi Toni! – Une vôs flape di femine. – O ai clamât plui voltes par telefon, ma cun cheste maladete di grocje al è dificil fasi capî.
– Amîs… – al veve dit Spilot, – Eco sberdeât il câs da la vôs di muart!
di Massim Furlan
#636
8 comments
Lasse une rispueste
Dutis lis contis
Massim Furlan a son simpri bielis lis tos contis, mi somein chês di Giorgio Scerbanenco…
Buine int, lis contis cun la firme incorporade (Rocheton e Cjarlins docet), podaressin vignî metudis su ancje cun la firme da pît; ce disêso voaltris? Se no masse facil!
Cence nuie gjavâ a lis contis, che a son simpri bielis.
Mandi
Scusait, mi jeri dismenteât di tornâ a bati sui coments anonims, vino pôre di mostrâ la muse? Sù mo sù mo.
Mandi
Culì e je le pene di Massimo Furlan, che simpri brave nus conte di Spilot, Roketon, cu lis sos cjantonadis a ciri le malefate.Lussian
le à scrite Massimo Furlan. Mandi
Nelo
Pauli, il prin coment al è il gno, mi jeri dismenteât di firmâmi, scusaitmi, Bepi
Grazie a ducj! Par me al è un onôr podê scrivi in cheste ostarie.
Un grazie di cûr al nestri ostîr che nus dâ cheste pussibilitât.
cheste e jere però pardabon masse facile di induvinâ 😀