CC24Avrîl#15 – Eliopause

#15 – Eliopause

E cemût sêstu, alore, dopo che il soreli al è scjampât indaûr e nol è nancje plui lusigne, nancje plui spin. Dopo che lis ultimis pieris imbramidis dal Sisteme Solâr a son glotudis e, glotude ancje tu, tu rondolis tal scûr. Cemût esal jessi alì e passâ il cunfin?
E cemût soio jo, cumò che o sai che tu âs passade cheste peraule che si clame Eliopause e che tu sês impastade ta ce che al è cuasi dut l’Univiers: materie oscure, invisibil pierdisi tal neri? Cussì tu, cussì jo.
E mi visi e no mi visi dal to partî e di cuant che tu mi saludavis de scjalute, prime di jentrâ te nâf, parcè che no si sa il lâ cuant che al comence. E no si sa il lontan trop lontan che al sedi. Un pas, o disevi, al è un pas e un braç al pues jemplâlu, lis mans tocjâsi. Fin che i pas a son doventâts un mâr, a son doventâts la nâf e il cîl che ti à supade.
E jo o pensavi al frêt, a un puest ultin tant che la Kolchìs, ma o disevi che ancje jo o vevi une nâf svelte plui di ogni bestie e che ti varès cjatade, ti varès puartade indaûr. E invezit no.
E cussì, cumò che al è tart, ti viôt, mi pâr, sfrancjade di lûs, sfrancjade di dut, galegjâ tal vueit intant che scais di piel si jevin dal vîs e tu tornis pes, tu tornis sarpint. E ti viôt, mi pâr, lis peraulis che a svaporin, che a jessin dal scus di stagnole e si glacin tal frêt.
E o pensi che no tu sês nancje chel, che tu podaressis stâ cence aiar, cence pinsîr e voltolâ. E voltolâ prin di cjatâti, ca di cualchi milion di agns, te costelazion de Lire o cuissà dulà e tornâ a jessi peraule, une peraule no plui nestre, no plui mê.
E ti viôt, mi pâr, cuant che tu disevis che stâ fers al è colâ, parcè che dut al va, dut al cole: la Tiere, il Soreli, la Stradalbe. E ancje jo, tu mi disevis, e tu e jo.
E cussì partî, cussì un pas dopo chel altri fin a no savê, fin a doventâ bateri, particule elementâr pierdude. Fin a jessi cussì in là, jessi inaltrò: pussibilitât di une rose, di un non, par un cualchidun inmò platât intal cidin.

di Stiefin Morat (Catine la Nere)
#1613

3 comments