LCPBDM #6.4 – Dissegnâ par vivi

Cuant che tu dissegnis no tu rivis a stâ tal cidin, ma no tu rivis nancje a scoltâ musiche par talian.
Lis peraulis, in cualchi maniere, ti jentrin tal cjâf e ti sporcjin la man e dissegnâ al ferme di jessi util, spontani, straviant. La soluzion e je scoltâ musiche foreste, se al è pussibil dulà che no cjantin. E cussì tu fasis, simpri, ogni volte che tu ti pierdis vie suntun sfuei blanc cui tiei penarei, o cui pastei, o parfin cui evidenziadôrs che ti à regalât un to compagn di Universitât, parcè che ti plasevin masse chei che al veve lui.

La man e va, par solit tacant di un colôr, un colôr sôl, che tu sielzis cun cure, e daspò di chel tu metis dongje altris, che ti parin vê un lôr sens, e tu vâs indevant a colorâ. Lis riis di neri tu lis metis, se tu lis metis, ae fin. Tu âs tacât cuant che tu jeris in prime superiôr, su consei de psicoliche. Tu âs tacât parcè che tu jeris une frute e tu pesavis trentenûf chilos e tu gjoldevis cuant che ti cjolevin pal cûl par trop magre che tu jeris, clamant in cause films di pôre e cjamps di concentrament.

No tu puedis dî che dissegnâ ti vedi salvade, ma dal sigûr ti à judade. Se no altri parcè che intant che tu pituravis, tu mangjavis alc, sedino magari patatinis o altris potacjos. Dome tai ultins timps alc al è cambiât. Tu ti metis li, denant dal sfuei, tu sielzis il colôr, tu tachis e… nuie, nol rive nuie. Tu ti jevis e tu lassis sta dut. Ti pâr che alc si sedi ingropât, inte tô maniere di straviâti. Tu ti cjalis i dêts e ti somee che a sedin masse grues. L’anel ti pâr strenziti. Il colôr des ongulis ti pâr sbaliât. No tu sâs se al è il câs di preocupâsi, ancje se al è di agns che chei pinsîrs no tornavin a cjatâti.

Di cheste robe no si vuarìs mai, ti veve dite cualchidun. E tu tu lu vevis simpri savût. Tu ti obleis a cjoli un altri sfuei blanc intant che tes orelis ti sune une cjançon strambe, che ti somee come se e fos sunade par contrari. E cussì tu decidis di fâ compagn. Tu cjapis in man un penarel neri, come se tu vessis di scurtissâ cualchidun, e tu sieris i voi. Lant daûr de musiche tu tiris des riis sul sfuei, a câs, di rabie.
Cuant che tu tornis a vierzi i voi, la musiche e cambie dal dut, e a ti ti pâr za di viodi i colôrs. Ogni tant bisugne tacâ par contrari, tu pensis, intant che tu scoltis la cjançon plui biele dal mont.

SUNNY’S TIME, Caribou, Suddenly, [2020] 2’49”

O sin lâts a cirî une cjançon di un musicist canadês dal ’78 che tai ultins 25 agns al à publicât discs sot almancul trê nons. Chel che o vin sielzût noaltris al jere Caribou, il plui innomenât, ma lu cjatais a inizi cariere come Manitobe e in dì di vuê ancje come Daphni. Sedi ce che al sedi, al è un che al messede musiche eletroniche e lu fâs une vore ben, sedi fasint balâ la int (no par nuie si clame Daniel Victor Snaith) sedi cun atmosferis plui sioris e cuietis. Il nestri toc si clamave Sunny’s time, lu vin cjolt dal disc Suddenly, dal 2020, e al jere cence dubit une des cjançons plui bielis dal mont.