LCPBDM #6.3 – Licantropi

Tu ti cjalis tal spielut de machine e tu ti domandis se tu sês pardabon tu, chel li. La lûs de lune no ti permet di viodi masse ben, ma tu sâs za cui che al è ta chel spielut.

Un om fat, che nol è ancjemò rivât ai cuarante ma che al à za mancul cjavei e mancul numars sul telefonut di cualchi an indaûr. Un che nol veve mai bevût un cocktail, fin usgnot, e al ordenave simpri bire, piçule e inutile. Un che al à sa za di sposâsi ca di un an e al sa za ta ce glesie e ta ce zornade. Cussì e à volût la murose, fisse di tant, e nol è motîf di discuti. Un che al lavore e al met vie bêçs pe cjase, za cjatade de agjenzie. Un che al à vût in vite dôs murosis, e une nome par un cuadrimestri, ai timps di scuele. Un che la scuele le à lassade subit, content di lavorâ in ufici, content di chê vite cuiete e normâl. Un che nol è biel e nol è mai stât biel, che nol è creatîf, che nol è simpatic, che nol è timit ma nol à nancje mai vût masse passion de int e dai contats umans. Un che al à simpri vude passion pe normalitât. Lis feminis, i libris, i films, la musiche, il gustâ in taule… No che ti dedi fastidi il diferent, ma tu âs simpri vût un parevoi, pes origjinalitâts. Tu âs une vite mainstream. Parfin il sushi, a ti, no ti stice e tu lu âs simpri evitât.

E cussì tu ti cjalis tal spieli e tu paris vie une ombre cuntune man, come se si podès parâ vie la serade pene passade, fûr di chel locâl, daûr di chel mûr, ta chel parchegjo, sul baûl di chê machine. No tu puedis, parcè che l’odôr al è ancjemò tai dêts di chê man che tu âs ficjât framieç di chês gjambis neris, e il savôr che tu âs in bocje si messede a chel dal piercing che e veve jê su la lenghe. E i vistîts scalembris, i cjavei colorâts, lis orelis plenis di fiers e il tatuaç framieç dal sen… no… nol va vie nuie. E no tu sâs nancje cemût che si clame.

No tal dîs, ti à dite jê su la ultime bussade. Al è dute la sere che tu mi cjalis, no stâ a vê pôre che si tornìn a cjatâ. E cumò tu restis a cjalâ la lune, che di masse agns no tu viodis cussì alte e al colm, stant che tu sês un che al va a durmî adore e nol cjale mai la gnot, a oris tardis.

E alore, ta chel spielut, sêstu tu, o sêstu un lôf di un film horror? Tu inviis la machine e si impie la radio, che e pâr vê scoltât i tiei pinsîrs e ti regale une cjançon che e je come la tô serade. Al è rap, sigure, ma un rap diferent di ogni rap che tu vedis mai scoltât, fin ta chê sere. E al è il plui biel dal mont.

MOONLIGHT, XXXTentacion, ?, [2021] 2’16”

Par cheste cjançon o sin tornâts un pôc indaûr tal timp, e chest colp e je une cjante une vore, ma une vore cognossude, soredut par cui che al è passionât di rap amerecan. Lui al è XXXTentacion, e al è muart a 20 agns, intune rapine, subît daûr di vê publicât il disc dulà che vin cjolt Moonlight, che si clamave dome cuntun pont di domande: ?. Ancje ca, stant che al veve di famee une divignince reggae, e ancje un vite avonde scjaldinose, o sin intune cjançon che par sedi rap e je avonde scalembre.

3 comments