LCPBDM #6.2 – Karaoke

Ce stufe l’amôr, ce stufe la int, ce stufe dut.
Tu âs sedis agns, cuasi disesiet, e tu sês za stufe di dut. Stufe di bevi, stufe di studiâ, stufe di lavorâ, di fumâ, di taconâ, di lâ ator, di cjalâ la television, di vê un murôs o une murose, parfin di vê un telefonut e di ogni robe che ti passe dentri di lui. Sês stufe di dut, parcè che al è dut compagn. E stufe ancje di dut ce che chei ator di te a cjalin e a scoltin e a bevin e a fumin e a taconin e a ti fevelin.

Cjape vuê, a scuele. Ieri sera mi sono fatta Kevin, e veve tacât une e tu za li tu vevis smetût di scoltâ. E trop che al è biel, e i muscui che al à, e i vistîts che al met, e la machine che al dopre, i locâi che ti puarte, la robe che si cale… Dut biel. Dut maraveôs. Dut perfet. Dal tai di cjavei ai cjalçuts. Dal russac a la maiute. Dai tatuaçs al piercing. De musiche che al scolte ai tiktok che al fâs. E a ti no ti plâs. Forsit tal imprin, ma dopo nuie, nancje un fregul. Lui e ducj chei come lui, fruts o frutis che a sedin.

E alore, par no sintî cheste deficiente de tô classe che e conte di îr di sere, tu ti paris sù i airpods e tu metis sù une robe a câs.
E e partìs une cjante che e somee che e feveli di te, cumò. Di te che ti plâs lâ al karaoke, ma che no tu lu disaressis mai a di nissun, parcè che al è di sfigâts, di vecjos, la robe plui cringe che si puedi imagjinâ.

Ma dopo inte cjançon e rive une vôs di femine. E alore tu ti inacuarzis, intun marilamp, che no je vere che tu sês stufe di dut. Intun salustri tu capissis che un che ti interesse al è, dome che al è cussì sfigât che no tu âs mai vût il coragjo di dîlu a di nissun, che ti plâs, nancje a lui.
Tu decidis che doman di sere, un zîr al karaoke tu lu fasarâs, e tu decidis ancje che chê li, cumò, e je la plui biele cjançon dal mont.

KARAOKE, Generic Animal, Marta Del Grandi, Un asino che vola [2024] 5’20

Cheste cjançon plui biele dal mont, invezit, e je plui gnove e avonde alternative. Lui si clame Luca Galizia, ma il progjet musicâl che al à metût impins, in bande de ativitât di dissegnadôr, si clame Generic Animal, e chest toc a dôs vôs e dôs animis si clamave Karaoke. La vôs feminine che e discoreve cun lui e jere chê di Marta Del Grandi, altre artiste une vore scalembre, di lâ a discuvierzi, e la cjançon e jere cjolte dal disc dal 2024, Il canto dell’asino.