CC24Lui#03 – Sculturis cul seglot

#03 – Sculturis cul seglot

O soi rivât te MZS a Otubar, cuant che e tacave le Vierte e in dôs trê setemanis, sul grant termometri dal Pinguinattolo si leieve bielzà il 7 e parfin il 6. A Dicembar al segnave adiriture 52 grâts.
Sot zero.
Al è plui cjalt dal solit, al veve dit Fredo, si pues tacâ a fâ lis sculturis cul seglot.
O vevi scuviert subit ce che al intindeve.
Al veve jemplât un seglot di aghe clipe, si jere vistût di escursion: ocjai neris, manecis, stivâi, cjapiele e siet strâts di tessût sul cuarp. Si jere ont di creme solâr. Jo lu spietavi te sale di decompression, lu cjalavi de puarte spalancade. Al veve tirât par aiar la seglotade di aghe, cundute la fuarce. Al jere colât jù un bloc di glace plen di picôi e crestis, alc si veve sfruçonât te colade ma la plui part e jere restade interie.
Le veve impirade suntun dai tancj grues tondins di fier, che cumò o capivi a ce che a coventavin.
Di chê volte, ogni doi trê dîs, mo lui, mo cualchidun altri de MZS – o sin cuasi une dozene, in servizi – al faseve une sculture. O ai provât ancje jo. Il curtîl de stazion al pareve un museu. A cene si fevelâ di lôr. Chê di vuê e pâr a un drâc! Pecjât che ta chê si è rote la creste, se no sâstu ce gjal! E vie cussì.
Nissune si disfave, a mancul 50, ma la robe strane e je che si movevin, a pirlavin, lis cjatavin rabaltadis, o voltadis, o soredut, e cheste e jere la robe straordenarie, cualchi volte si zontave une onde, une stalatite, une sborfade di aghe glaçade, che i deve une forme diferente o plui definide. Neancje ch’a fossin vivis.
Ma nissun i abadave. Anzit, si comentave ancje chel.
Cui al varès dite che al jere un flôr! Ma cjale: e pâr un Dalì… E vie cussì.
Une volte o vevi domandât, a no mi visi cui, e mi veve rispuindût cussì: Il fantacin al à pûr di zuiâ. Jo vevi fat fente di nuie, ma o soi zovin e o jeri stuf, stuf e stuf. Achì o sin simpri sierâts, parsore di 28 milions di km cubics di glace, tal mieç di sclapons fonts centenârs di metris. O volevi discuvierzi il misteri! E cussì mi jeri metût in vuaite, di gnot, striçant il voi pal lusôr. Fintremai che lu vevi viodût: un stralûs sore il glaç, jentrâ tal curtîl.
Al someave uman, ma nol podeve jessi uman! Al jere vistût masse pôc e po, no si movisi cussì a chestis temperaduris! Al veve tacât a zuiâ cu lis sculturis. Ehi, ciao! I vevi berlât stant dentri, ma chel si jere spaurît, al jere corût vie. I vevi corût daûr, cence abadâ a nuie. O jeri jessût e dopo al è deventât dut neri.
E dome cumò o torni te Stazion antartiche Mario Zucchetti, no sai trop che soi stât fûr. Il riflès dal soreli su la nêf no mi ferìs come che o crodevi. O viôt une gnove sculture, intal curtîl. Biele, ma forsit e va zirade un tic, par jessi perfete. Soi cence manecis, ma o tachi a mateâ. Di dentri o sint lis vôs dai coleghis. Une che no cognòs e domande cemût mai che o fasin chês sculturis cui seglots.
I fantats a àn pûr di zuiâ, i rispuint cualchidun.

di Milio dai cjans (Vercingetorix)
#1691