CC24Avrîl#16 – Animulae

#16 – Animulae

Tu ti clamis Nicole e tu vegnis de Europe. Tu vignivis. Cumò tu sês presinte dome in spirt, jessint muarte dopo di chê dì tremende. Tu jeris cui tiei amîs a balâ a une biele fieste cuant che tu âs sintût a sparâ. Dal cîl a son vignûts jù dai oms cu lis alis che no jerin agnui ma diaui. Dopo a son rivâts altris cuntune camionete vierte.
Ti àn violentade; ti àn rot braçs e gjambis. A berlavin che Diu al è grant; ti disevin che tu jeris une strie. A la fin la tô anime e je lade fûr dal cuarp e tu âs viodût, pûr cence vê i voi, che ti taiavin il cjâf.
Cumò tu sês achì, intun puest di ombris come te. La tô memorie e esist ancjemò ma privade dal cuarp. No tu sâs dulà che tu ti cjatis e no tu sâs trop che al durarà chest to flus di cussience.

Tu ti clamis Zulayka e tu âs cuindis agns. Tu âs simpri vivût achì, ta cheste citât grandonone, dute di ciment, ma che une volte e jere fate di tendis: fin a vuê, parcè che cumò tu sês presinte dome in spirt; tu sês muarte dopo ce che al è sucedût cuant che a son rivâts i cjararmâts e i avions dal nemì e une bombe e à centrât il palaç dulà che tu vivevis cui tiei parincj. Prime e je rivade une bombe di avertiment: e faseve dome rumôr. Alore tu sês scjampade cu la tô famee fûr dal palaç. Tu cirivis di lâ lontan ma daurman e je rivade la bombe vere che e à distrut dut il palaç. Ce fracassine! Il rumôr dal sclop ti à fate deventâ cuasi sorde.
No tu viodevis plui i tiei.
Un om ti clamave fasint segn di lâ cun lui. O vês fate pocje strade, sintint il cracâ de metraie. L’om al è stât crevât in doi des palotulis. Dopo al è rivât dongje un cjararmât. La metraie e à pontât cuintri di te ma no à sparât; tu ti sês platade daûr di un mûr dirocât. Dopo tu âs sintût un altri ton fuart. Po plui nie: tu sês muarte, sfracaiade dal mûr sdrumât dal dut. La tô memorie e esist ancjemò, pûr jessint cence çurviel e cuarp. No tu sâs dulà che tu ti cjatis e trop che al durarà chest to flus di cussience.
Cumò tu sintis une presince dongje di te.

di Checo Tam (Derna)
#1614

1 comment