CC24Avrîl#13 – Ti prei

#13 – Ti prei

Tu ti jevis simpri a buinore, e tu mi lassis simpri dut a puest: gulizion, pulizie e vistîts. Dut ce che mi covente fin che tu ti tornis da vore. Cuant che tu rivis te strade tu mi fasis un ultin salût a man alçade cjalant viers il barcon. No tu âs mai fat falopis: tu mi lassis ta la posizion juste par vioditi, saludâmi e slontanâti jù pe strade.

Cuant che tu ti tornis la prime robe e je netâmi. E al stes timp tu mi cjalis, tu mi fevelis, tu fasis fente di vê un dialic, di viodimi un sest o un riduç ta cheste muse che e sarà simpri conzelade intun stes mot.

Tu vâs te tô stanzie, sieris la puarte. Tu vais.

E tu no ti visis che jo mi visi.

Tu âs chê di no nomenâ nuie che nancje par ombre al fasi riferiment al dî dal incident. Juste apont che devant de TV tu cambiis canâl se a comparissin imagjins di chel model e colôr di machine.

E tu tu pensis che cundut chel, par me alc al cambiedi?

Aes undis in pache tu mi metis intal jet. E tu metis vie (tu le platis in realtât) la carocele tal armaron. Tu ti metis dongje, e tu mi fevelis cun tenarece come che o fevelavin daspò di vê fât l’amôr cuant che mi sintivi parone dal mont.

Tu preis, e jo o sint la to compassion, e jo in cidin o sclopi di rabie e impotence. E o pensi, ce raze di Diu ti lasse il cerviel come uniche robe a puest dal to cuarp, nome par visâti simpri di dut ce che no tu podarâs fâ mai plui?

E tu amôr gno, tu varessis inacuarziti par une volte di ce che a disin i miei voi e cjatâ la forme discrete di liberâti e liberâmi.

di Zorç Cesaratto (Matungo)
#1611

2 comments