Fade o strie

Se jo o fos siore e no maridade, o Signôr benedet, no mi pierdarès nancje un teatri, nancje un film a pene vignût fûr intes salis, o sarès inte prime file di cjadreis a dutis lis presentazions di libris, di spetacui, di novitâts di cualsisei gjenar: cheste e je la vite che mi sarès plasût vivi jessint libare… Il gno piçul svual in libertàt jo m’al cjapi a chi, jenfri lis riis des mês peraulis, “tichetucant” intai tascj dal ordenadôr. Vongolâ jenfri i post, cjaminâ sui trois dai ricuarts, vaî daûr des lagrimis di int che ti fàs ridi e ti ten companie… cussì  mi sucêt cualchi volte di sbati il mustic su alc di biel che al samee  scrit propit par me, par la mê anime…

“Lis fadis ignorantis a son chês personis che o incuintrìn e no cognossìn, ma nus cambiin la vite. A son chês personis che, jentrant par câs o pur par destin inte tô vite, cence volê, ti fasin scuvierzi alc di te che no tu vevis mai nancje par dongje prossumât esistès o che tu vevis simpri vût pôre di ameti che al fasès bielzà part di te. A no son chês des flabis, parcè che lôr cualchi bausie a la contin. A son ignorantis, esplicitis, ancje dongje pesantis ciertis voltis, ma no mintissin sui sintiments.”

Un grassie a la persone che e à tirât fûr di cualchi bande chest tocut plen di poesie, dolçôr e fintremai un tic di maluserie di poete. Se une dì le cognossarai, cheste persone, i domandarai ce che e pense di mê,  cemût che mi viôt: fade o strie?

di Barbara Battel
#933

1 comment