Tamossis

O soi sveât adore, nol criche anciemò dì.
O spieti che al vegni sù il cafè par bevilu e partî, o ai za cjamât, îr sere, in machine il cavalet, i pinei, i colôrs e dut l’armamentari che mi servìs par piturâ.
Cualchi zornade fa o ai cjatât, ae fin de planure li che lis culinis a scomenzin, un puest là che al somee che il soreli, cuant che al jeve, si fermi par un moment.
Ae fin di Setembar la rosade e je simpri bondante e i prins rais dal soreli, rivant une vore inclinâts, e varessin di fale sflandorâ come pieris preseadis, par chest mi spieti une maravee di colôrs.
O voi a piturâ un cuadri, come che si use di “en plein air” no sai se o rivarai a rindi chel che mi spieti di viodi: o soi plui convint di butâ vie timp e colôr.
Fermi la machine, smonti, tiri fûr il cavalet e dut il rest, met a puest, prepari e ve che il soreli al tente di fasi viodi o spieti che al si decidi a cjapâ fuarce par dâmi la lûs juste cuant che cun la code dal voli le viôt.
E ven jù de rive, zovine, biele, cu le vieste che e tapone ma e lasse imaginâ e cjaminant svelte e môf la jerbe fasint colâ le rosade e la jerbe e cambie di colôr come il mâr cuant che e passe une barcje.

La lûs e il paesaç che o cirivi a chê vision a sparissin.
O rivi a capî a colp i grancj pitôrs: Botticelli cun le sô Venere, Tiziano cun la Venere di Urbin e Goya cun le Maja desnuda.
Le fermio? Ce i disio? I domandio se o pues piturâle?
E rive dongje di me .
Dai lavris mi jes la robe plui stupide che o podares disi: “Frute, dulà vâstu cussì di buinore?”
E jê: “O voi a cagâ tes tamossis che a cjase no vin il cagadôr”.

di Pauli Fantini
#923

3 comments