Che dire? Letta tre volte, e non basta mai. Bellissima conte, profonda drammatica risolutiva.Grazie per la canzone di Tom
Il Grant Macel di Zenet
Il planet Zenet al jere piçul e lôr a continuavin a rivâ.
Su la tiere rosse lis talpadis dai Piçui Pîts aromai no si contavin plui. A rivavin su Zenet stracs e cence nancje un lingot di aur, tabaiant une lenghe strane fate di sunôrs.
Il Grant Macel nol vignive plui doprât di cuant che i zenetians a vevin scuviert cemut nudrîsi dome de lûs des stelis, ma une volte alì si copavin i fùrics*. Po la struture e jere stade adatade a centri di acet par umans: “i forescj bisugne judâiu”, lu prescrîf la leç interspaziâl.
Il macel si cjatave fûr dal centri, suntune strade grande che e puartave de Citât ai paîs dongje. Si viodevin dispès i umans a fâ chilometris, cui lôr piduts piçui (e tignêt cont che ’nt vevin dome doi) che a talpassavin la tiere, par rivâ in Citât e comprâ di mangjâ. Si nudrivin di pirulis di sucar e proteinis che i Zenetians aromai i davin di mangjâ dome ai animâi di companie. E insom insom – ducj lu pensavin – i umans a jerin tant che animâi, e no dome parcè che a mangjavin.
Di pôc la Zonte Zenetiane e veve rindût lis regulis di acet un pôc plui duris. Il macel al jere stât rinfuarcît cun recinzions, mûrs, fil eletrificât, e un centenâr di poliziots cun indurmididôrs e armis laser lu varessin presidiât. Il spazi dentri al jere stat dividût in dôs parts: centri di acet e preson. Di une bande i umans pene rivâts, chei che no vevin ancjemò fat i esams par vuadagnâsi il tatuaç “Z” de citadinanze sul braç; e di chê altre une preson di sigurece massime, dulà che a saressin lâts a finîle i umans che a vevin pierdût la preziose “Z”. Daûr des regulis di Zenet, il tatuaç al vignive russât vie dai operatôrs de Zonte come punizion pai umans che refudavin di lavorâ a Zenet (lis condizions di vore, buinis o brutis che a fossin, no jerin consideradis) o par chei che a vevin fat cualchi dam. Ducj a vignivin ingrumâts te preson, e i Piçui Pîts cul braç ruvinât a viodevin des sbaris chei altris Piçui Pîts che a stavin tal centri di acet. Lôr a podevin jessi fûr, ma a vevin oraris di rispietâ. I zenetians no lavin spaurîts, e i umans a vevin simpri fat pôre, soredut cuant che si movevin, cu lis lor talpadis, tal scûr.
di Margarite Cogôi
*animai taronts cun sîst çatis, tipics di Zenet, une vore saurits, che o podês viodi te imagjin.
3 comments
Lasse une rispueste
Dutis lis contis
Il Grant Macel di Zenet! Dulà? Ma a Zenet, po! Cemût no savês dulà che al è? Facil! Cjalait dret in direzion Aldebaran, dîs agns lûs prime o zirais a man çampe e dopo simpri drets fin a Zenet. Lu cognossês subit pe biele tiere rosse! Podopo, stati atents ai zenetians, che secont mê no son propite un dai popui miôr de galassie. Nus al conte la nestre massarie, cun cheste conte di fantasience, plene di revocs brownians, buine par scomençâ la setemane!
Jesus mari mont, che Diu al proviodi, e ce tant ancje al viodi, che mai no sucedi, e che le int pari sedi, di ogni cjanton dal boconon univiers. Compliments a le fantasientifiche massarie a naviga cussi ben disore lis stelis. Lussian
Grazie Lussian! 🙂
Magari cussì no, Zenet nol è cussì lontan e anzit il me viaç al è stat ispirat de ex caserme Polonio di Gardiscje dal Lusinç… Ciertis voltis la realtat e supere la fantasie. De bande nestre, cirin di no fa masse i Zenetians, che no nus dan un esempli masse bon. Un salut!