Studiâ di guriut

Il guriut Toni al veve la passion pal studi, tant che invezite di stâ come i siei amîs a zuiâ cui sbilfs tal bosc, al veve miôr platâsi davour di un platin a lei i libris che i prestave il saç dal siò paîs. Ogni tant al lave a fâ une scampagnade cun chei altris, ma al coreve pi di ducj: a nol viodeve la ore di tornâ davour di un noglâr par studiâ. Al voleve savê dut, e il timp a no i bastave par studiâ ducj i libris. Mancjant il timp, Toni al veve tacât a no mangjâ pi: ogni tant al tirave jù une cespe dal cespâr o un piruç dal piruçâr, ma al veve miôr  cjoli lis moris tai baraçs, cussì nol veve nancje di fâ la fadie di alçâsi. Al si jere metût a studiâ dongje di un lât par no pierdi timp par lâ a bevi e a nol durmive mai. Viodintlu in chestis cundizions il saç dal paîs al veve tacât a no prestâi pi libris, alore Toni al veve scomençât a freâju di gnot. Toni, imbambulît tal siò studiâ, a nol voleve pi viodi nissun e al stave simpri piês, parcè che pi al studiave e pi si inacuarzeve che nol saveve. Une gnot al jere passât un sbilf par lì dal lât e par fâi un dispiet i veve ribaltât i libris te aghe. Toni si jere sustât une vore e al veve tacât a dâjù al puar sbilf, che par fortune al jere rivât a scjampâ vie.
Dopo une setemane interie ch’a nol durmive par concentrâsi in tal studi, une agane, che e viveve in chel lât, i veve fat adiriture une magjie par permetiji di durmî cuntun voli sierât par volte, lant indenant a lei cun chel altri.
La situazion però e leve in piês: ducj chei ch’a levin a cjatâlu a vignivin sbruntâts vie.

Il saç dal paîs alore al tire fûr une des stelis che al à cjapât sù di zovin e la dopre par mudâ ducj i libris di Toni. Ogni volte che Toni al vierç un libri invezite di saltâi fûr il savê i saltin fûr i ricuarts di cuant che al lave a zuiâ cun chei altris guriuts e cui sbilfs, e chescj ricuarts a ju viôt limpits, come se al fos lui che ju vîf par dabon in chel moment. Al si divertìs a viodi dute chê gjonde, dute che ligrie, ma si cruzie dal fat che a sedin dome ricuarts e no realtâts e dal fat che nol à pi amîs par zuiâ. Scunît, par chest al si bute tal lât de ponte dal rôl, ma la agane lu salve e lu puarte dai siei amîs che lu invidin subit a zuiâ.
Di chel dì Tonin nol à studiât pi tant come une volte, ma al zuie cui siei amîs e al insegne lis robis che al à imparât ai fruts dal siò paîs.
Il studi al è une vore impuartant, ma nol à di jessi la uniche robe che si fâs: bisugne vê il timp di zuiâ cun chei altris!

di Davide Peressoni

#860

2 comments