Che dire? Letta tre volte, e non basta mai. Bellissima conte, profonda drammatica risolutiva.Grazie per la canzone di Tom
Sui dêts de man
Dîs robis i plasin, lis à contadis sui dêts de man. A podaressin jessi di plui o di mancul, ma al va mat pai numars taronts e pe precision gjeometriche des robis.
I numars taronts, prime robe che i plâs.
I cuadris stuarts ju drece pene che al pues e po si sint miôr. Dreçâ cuadris stuarts, seconde robe.
I plâs sintî il tic tic tic dai tascj dal PC cuant che al bat un test. Tic tic tic, un rumôr piçul e insistent. Forsit la robe plui biele e je capî che la velocitât dal tic tic e je compagne ae velocitât dai soi pinsîrs. Pinsîrs impulsîfs, butâts fûr cence passâ pal sisteme di filtrament? Un tic tic di metraie, svelt e liberatori. Alc di impuartant di scrivi, une mail masse pôc formâl, une declarazion di sintiments masse sincere…? Un tic tic plen di dubis, riflessîf: dêts prime sveltonons, po lents e po svelts di gnûf. Il tic tic dai tascj de tastiere, tierce robe.
Nasâ l’odôr dai libris (ma chel al è un classic), cuarte robe.
Mangjâ jemplântsi masse la bocje, gustâ la maleducazion dal fat, cuinte robe.
Seste robe, cjareçâ i gjats e cirî di proviodi il lôr mût di movisi.
Setime robe, lâ fûr di cjase in Inviêr, sintî l’aiar frêt in muse e cjalâ lis monts. Cuant che si viodin dongje dongje, come un cuadri iper realistic, cui crêts parsore blancs, i boscs verts che a cressin un pôc dulà che i pâr a lôr, lis ombrenis fatis dal soreli. O cuant che a son celestis e a samein bidimensionâls.
Otave robe, cjatâ alc che no si spietisi intun lûc dulâ che si crôt che nol sedi nuie. Une caramele sbandonade inte sachete de gjachete, o un biliet scrit di cualchidun platât intun libri.
None robe, durmî.
Sintî la int che a cjante par strade intant che e cjamine, pensâ che e cjante par sé e che no i interese di ce che a pensin chei altris. Decime robe.
Decime?
No, spiete. Cemût al ae podût dismenteâ il plasè di une bussade, il calôr dai lavris che si tocjin planc? E l’inmagament di lâi daûr cui dêts aes grispis su lis mans di un vieli?
Al tornà a fâ la liste di gnûf, partint di zero.
Prime robe…
di Margarite Cogôi
#831
3 comments
Lasse une rispueste
Dutis lis contis
Tachìn daurman la setemane cuntune altre conte dal Contecurte day! E a chi al tocje nuiemancul a la nestre Massarie Margarite che e cjape inplen il teme dal dîs e e pense ben di fânus fa une liste. Une liste di robis che a meretin, inte vite. Si sa… meti dongje listis e elencs al jude a sclarî lis robis… o no? Leieit par scuvierzilu!
Par curte che sedi le vite, i plases e i displases no al è facil faiu stâ sui dêts di dôs mans, ma al è simpri miôr chei no catalogâts rimetiu sui dêts des propris mans cence doprâ numars forêsts.Margarite a à volût doprâ il dîs onorant i numars l’ un da l’ un, bule intal so intent. Lussian
1. Il profum dal tei florît
2. Cuant che ti ven une batude tal stes moment che al to amì
3. La prime torte di miluç fate cu lis pomis frescjs in autun
4. Il gjat che ti fâs il pan intor
5. Cuant che un frut ti busse cence che j al disi la mari
6. Lis seris di jugn che al pâr che nol vegni mai scûr
7. Cjatâ scrite ta un libri une robe che tu as simpri pensât, dome che no tu savevis spiegâle cussì ben
8. Meti a puest lis robis par colôr
9. Lâ ai concerts
10. Insumiâsi di une robe biele e par un moment apene sveâts pensâ di jessi ancjemò tal sium