Che dire? Letta tre volte, e non basta mai. Bellissima conte, profonda drammatica risolutiva.Grazie per la canzone di Tom
Echo
Une sere di istât dal1982. Al jere te cjamare dai siei. Al veve viert il televisôr narançon, un Telefunken b/n. Mame Rai e trasmeteve “Milano Suono”. Veju li, a sunâ intun parc di Milan, i Echo and The Bunnymen, di Liverpool, i fîs suturnis dai Doors, i nevôts di David Bowie… Lui al veve scuviert il non di chel complès su Ciao 2001, un gjornalut di musiche par zovins. Suns misteriôs, une vôs suturne, chê dal cjantant che al sune ancje la ghitare ritmiche. Ce diference de musiche pandude normalmentri su lis radios FM! Chês a son cjançonetis. Echo a fasin alc di plui profont, al è clâr.
Viers la fin dal conciert al rive il papà. Al è incazât cun so fi. “Ce stâtu simpri siarât in cjase? Parcè no vâtu ator cui amîs?” i berle e al sbat la puarte tornant vie. Il fi, plen di rabie, al cjape une cjadree stîl Impero e le sbat cuintri l’armaron.
Ce rispuindi? Parcè fâ la ator cun chê int ignorante? Amîs? Ma se i vevin pissât tal serbatori dal motorin… ma se lu lassavin simpri indaûr parcè che a vevin i motôrs trucâts… ma se lu coionavin parcè che nol veve la morose… E dopo a fasevin ancje di piês… a metevin modons tal mieç des stradis di gnot, a spacavin i cartei stradâi e, platâts tes blavis, a fasevin i gavetons ai puars vecjos che a passavin in biciclete. No. Papà nol pues capî. No si pues lâ ator cun chê intate; il fi al à di cjapâ une altre strade… al à miôr sierâsi dentri a sintî musiche…
24 Avost 2018. Pordenon… Echo & The Bunnymen… Une altre pagjine blancje di jemplâ… tante int di tornâ a cjatâ, int in sintonie… tante buine musiche di scoltâ… Pecjât di no podê spiegâ al papà che il fi al veve fat ben ta chê sere di Istât di tancj agns prime a restâ sierât in cjase…
di Checo Tam
#743
3 comments
Lasse une rispueste
Dutis lis contis
Nus ven a cjatâ il Checo, dopo jessi stâts al conciert di Pordenon, sot la ploie, e sot l’aiar garp e dolç dai ricuarts. E cui miôr di lui, di lei intant che si scolte la cjançon dai Echo, plene pardabon di revocs e sunôrs cence etât.
Le potenzie de musiche torne dâ zoventût cuant il timp le à za mangjade, e dentri ches notes il spirt a si tempre dant al vivi la fuarce di sei. Simpri fuart il Checo. Lussian
Be’ ti disarai, Nello, ancje jo, vint il papà operari e ex contadin o jeri stât inscuelât cul PCI e, cuant che o scoltavi BANDIERA ROSSA su KOPER richiedude di un nono partigjan de Romagne mi vignive il pêl dret… e jere une orchestre stupende… ancje cumò al è facil comovisi ancje se il timp al è cambiât e lis banderis rossis a son aromai stadis metudis te naftaline…
Firmât (e no mi vergogni come tancj che a àn fat abiure)
CHECO TAM