“Il Cjai di Gjalarian (2)

“Il cjai” dopo finît lis scuelis elementârs, al cjatà un aiût par lâ indenant cui studis, de sô mestre des elementârs , che i disè che al è un pecjât lassâ i studis se un al è puartât come lui. Jê, tratant di judâlu, si contentà, di fermâsi dôs zornadis par setemane cence sei paiade. Dopo trê agns di studis e vignì la ore di presentâ la domande di iscrizion ai esams di maturitât, che e costave in lire plui o mancul 540 francs. Prime mê none e fevelà jê cul so om par viodi di fâi gambiâ idee ma Celeste nol sintive di chê bande, e dutis lis insistencis e lis promessis di gno pari no servirin propit a nuie. Aromai Celeste al jere partît in cuarte disint “e je ore che tu provis a viodi di ce bande che e rive la magnocule e no a pierdi timp a zuiâ cui libris.” e cheste rispueste i restarà come un stamp a fûc sul cûr par dute le vite.
“Il Cjai” costret a lâ a vore, par un pôc di timp al jere lât a imparâ il lavôr di marangon li di Remigjo “strissule” fin ta chê dì che al rivò a convinci il barbe Meno a prestâi la biciclete, e al le a Milan. Un amî di Gjalarian i veve fat un biel acet, par doi dîs lu veve tignût a durmî e dopo al jere rivât a cjatâi une stanzute intune sofite in afit.
Passade cualchi zornade a cirî di un lavôr al rivà a fâsi cjoli a vore intune fabriche di veturis di lusso “la Isotta Fraschini”. Cul aiût dal cjâfrepart al le scuele serâl, dopo finît il lavôr in fabriche. A jerin agns di sacrifizi, al veve di paiâ il fit pe stanze e par mangjâ no i restavin tancj bêçs; par tancj mês al vivè cun doi ûfs, un pagnût e mieç litri di lat in dì. Cussì al cjapà il diplome di mecanic-eletricist. Cuant che al jere a Milan al veve cognossude une biele fantate furlane, dopo un pôc di timp che si cognossevin e pensarin di meti sù famee. Si che al jere di gambiâ cjase e cjatâ un lavôr paiât miôr, e dopo un tic di timp al fo cjolt a lavorâ inte grande fabriche di motôs eletrichis, “La Bran Boveri”. Intant si jere maridât e al jere deventât pari di une biele frute, la mê prime sûr, ma il diaul al remave cuintri e l’Italie e jentrâ in vuere. Gno pari riclamât come artiliêr di mont. Al veve scugnût tornâ tal paîs di Gjalarian cu la femine e une frutute e lassâ il sô amôr e la sô frutute te cjase dai Gai.
Al partì une matine viers il front dongje Vipac, e dopo nancje un mês al varès vût di partî pe Russie, ma cul so mût di fâ al jere deventât amî di un graduât, che dopo fate une visite mediche lu fasè cjoli a lavorâ inte caserme Caverzerani
di Udin. Intant la vuere e finì, e dopo lis votazions par meti la Republiche tal puest dal Re, ducj chei che a jerin a lavorâ intes casermis a finirin cul sei disocupâts. Gno pari al cirî di fâ un pôc di dut cui lavôrs che al saveve fâ. E si jere metût in liste par lâ Sindic.
La prime votazion dai conseîrs al veve cjapât 10 vôts lui e 10 vôts Un altri di Sante Marie, Te Seconde votazion, so cusin e un altri dal paîs dopo une consulte a diserin No podin meti Sindic un che al à dome une vacje. Dopo chiste sconfite cu lis cognosincis che al veve fatis al veve metût sù une companie di viaçs par mandâ la int a lavorâ in Australie, ma ancje culì al jere plui ce che al rimeteve che ce che i vanzave, alore une mê cusine de France i cjatà di lâ a lavorâ in Camerun. In varès tantis di contâ ma voi a risi di stufâ e chest no mi fâs plasê.

di Plume di ingjustri

#739

4 comments