Nol vâl vendi il cjôt, par comprâ il purcit

La dì che il sior Marangon al veve decidût di vendi la sô femine al jere un joibe. Vinars di sere al veve bielzà scrit l’avîs par Citta Nostra, sabide al veve publicât chel su Subito.it e domenie, par no lassâsi in bande nissune pussibilitât, al veve spindût il desio par un trafilet sclagn e minudin inte ultime pagjine dal Messaggero Veneto.

Lunis di sere l’afâr al jere fat. A vevin clamât a desenis, ancje se tancj dome par tirâ jù il presit o par sigurâsi dal bon stât de so Mariute, cirint di capî se e veve cualchi difiet. Il sior Marangon ae fin al veve sielt un ciert Londero, di Glemone, che i someave persone afidabile e no il solit menebigui. Si veve fat dâ la direzion di pueste e la matine dopo, rivade la notifiche dal versament sul cont in bancje, al veve metût in man a Mariute une valisute e la veve mandade a chel paîs. Propit Glemone, sì; cuntun pataf sul cûl e un itinierari di Google maps sul telefonut.

Ta chê sere, al pensave, al varès podût poiâ i vues su la sô poltrone, denant dal caminet, leint la Gazete compagnât dal cricâ dal fûc, fumant la pipe e gjoldintsi i glotârs dal so lat cjalt, cence lis nainie e la vosate di cheche che i cridave di continuo.

Vendint la femine al veve vuadagnât il timp par stâ ben, al pensave.

E al jere lât indenant a pensâlu ancje cuant che, gnervôs e malcuiet, intal rivoc di cidinôr de cjase vueide, nol veve capît di vê cuistât ancje une altre robe: la stufe!

• 

  Anonimo has written: 14 di Març dal 2018 at 7:56 PDM Rispuint

  Biele conte, cu le sostanzie di une parabule,tu vevis di publicâle il vot di Març.E rivuardant il marangon,oltri le stufe intôr,ch'al controli se scomencin a clopâ lis tre colonis de cjase, come daûr famôs proverbi su lis feminis. Lussian
• 

  gelo has written: 14 di Març dal 2018 at 8:34 PDM Rispuint

  grassie Lussian! tu sês simpri presint e il prin a lei, e tu âs reson… vevi di metile il vot!
• 

  Giovanni Nello Malisano has written: 14 di Març dal 2018 at 5:12 DM Rispuint

  Lussian, se la ves metude sù il vot, puar Rafael. Lis feministes lu varessin brusat in place per misogjinie. La conte? Une sacrosante veretât. Di fat in chestis zornadis che la femine no je a cjase, (Jo no le ai vendude) mi sint in Paradîs.
• 

  Anonimo has written: 15 di Març dal 2018 at 6:39 PDM Rispuint

  Nelo no sta fami spiâ ce che tu âs dit,viôt che le to femine e je vignude in Friûl inte cjase difront le me,al baste pôc che fasi il spion a pandi ce che tu âs dite…A part il scherç e àn reson a dî che ten adun tre colonis de cjase,tal dîs jo che soi a lis provis. Lussian