Catinute

Fantate tal bosc – V. Van Gogh

Un daspò misdì di mieç Otubar al è soreli e l’aiar, ancjemò clip, mi invoie a fâ une cjaminade pai cjamps. Cussì o cjapi par la Armentaresse, une stradele di campagne che mene fûr paîs.

I colôrs des plantis, inte Sierade, a jemplin il voli e il cûr e o cjamini cun calme, gjoldint chel spetacul.

Rivât intune beorcje, di lontan o viôt une frute, sentade su di une cjoce. Mi incuriosìs subite la monture che e à: un golfut colôr pane lavorât a rosutis, une cotule a cuadrei di Scozie e cjalçons blancs fin sot dai zenoi. I cjavei po, a son petenâts a strecis, tignudis di doi nastruts ros. O pensi subit a la mode dai agns Cincuante e che la zoventût dal dì di vuê, fin a chê altre d’, no si vistive cussì. Mi svicini e la saludi e je mi rispuint cuntune vosute timide, di fâ tenarece. I domandi ce che e fâs di bessole pai cjamps e je mi conte che si clame Catinute e ogni tant e salte fûr par straviâsi, e che a stâ miôr fûr che dentri. Intant che e tabaie, la cjali ben e o viôt che e je une vore palide e e à i voi cerclâts come se e ves cetant patît. Mi conte ancje che so pari al è ni vore trist e dispès al torne cjase cjoc. Cuant che al à bevût po al peste jê e sô mari: “La ultime volte che mi à dât, mi à sbatût il cjâf cuintri il mûr cetant fuart che di chel moment no mi visavi plui di nuie”. Jo no sai ce dîsi par consolâle e i auguri che lis robis a vadin miôr. Jê e scjasse il cjâf, serie, e i scjampe un: “Aromai!”. Po si alce e mi salude: “Graciis par vêmi fat companie, ma o scuen lâ, che mi spietin!”. La viôt slontanâsi, planchin, par la stradele che puarte al cimitieri.

No ai plui viodût Catinute.

Pôcs dîs dopo, la dì dai Sants, o voi a puartâ un vâs e un lumin su la tombe di mê mari e dopo cualchi recuie o fâs un zîr pal cimitieri, come che o fâs ogni volte. Passant denant a un cjanton cun vecjis lapidis ingrumadis, mi cole il voli suntune fotografie ni vore smavide, che mi pâr di cognossi. Mi svicini e o lei: Goi Caterina nata il 18 Aprile1942 – morta il 10 ottobre1954.

Intun marilamp mi ven iniment Catinute, e o resti di clap.

• 

  Anonimo has written: 8 di Fevrâr dal 2018 at 1:30 DM Rispuint

  Mi è plasût lei.Conte che met tante tenarece
  su di che puare frute, vignude fûr da piere tombâl a suiâ sot il tivid soreli di otubar
  il displasè di un pari violent a gasparâ le so vite intal flôr de etât.Ben poiade Pauli. Lussian
• 

  Anonim has written: 31 di Otubar dal 2018 at 7:54 DM Rispuint

  Un classic… e je une liende metropolitane… o miôr de campagne ta chest câs… le cjatìn in cetantis variantis ator par variis culturis dal mont

  Firmât: DDR
• 

  Barbara has written: 31 di Otubar dal 2018 at 9:36 DM Rispuint

  Pauli, e je une vore fuarte la dolcece sprececûr di cheste conte. Mi puarte a pensâ ancje in tropis cjasis che il vin al comandave sul çurviel di cui che al beveve e cetant dolôr che al semenave daûr di chês puartis…Di piçule o vivevi intun cjasâl lontan dal paîs e, cuant che o passavi in bici dongje di cualchi altri cjasâl, butant il voli su la puarte vierte…mi suçedeve di viodi un butilion di vin in mieç de taule. Mi vignive di vaî al pensîr de soference jenfri chei mûrs…