Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Timp di cjarecis
A mi ven dongje il bintarut dal gno cûr: Jan, il nestri nevodut al à zuiât, saltât, dentri inte cariole al zigave cun che vôs fine che al à, intant che Odillo lu savoltave di corse, parfin sul puint dal piçul lât des rainis, fasint fente di fâlu colâ dentri de aghe: “Dai Odilo, ancjemò uns doi zîrs de muart (le fantasie di Odillo e fâs vignî i i sgrisui!)”. Cun Odillo al va simpri ben, parcè dut al devente zûc e aventure, Odillo cu la gome de aghe lu implombe e lui al zighe “None Barbara, cjale ce che mi fâs Odillo!” (che, voltât par furlan, al sune pressapôc cussì… Odillo fâlu ancjemò” A misdì jo, invezit, a mi jeri becade une rispueste nuie mâl cuant che i vevi domandât di diliberâmi la taule par meti la tovaie:”Uffi, no soi migo un sclâf!”
Ma cumò al è strac il piçul e mi ven dongje, imbraçântimi lis gjambis… Si sintìn, lu ten tra i braçs e lu cjareci parcè che o ài capît che chest par lui al è il moment di fâsi figotâ. Al passe dongje Odillo e i dîs: “Ce fâstu ali, cun jê, soio o no soio jo il to nono preferît?” Jan no i rispuint, ma mi cjale cun dolçôr e a plancut, che nol sinti Odillo a mi cisiche: “Ducj doi o sês i miei preferîts!” Simpri cjareçantilu jo i dîs sot vie: “Lu sai, ninin: a lu savin ducj doi che tu nus vuelis ben, a ducj doi inte stesse fate, inte stesse misure, ma no stâ a dîial al nono, che lui al vûl che tu sedis dome par lui… miôr no dîi nuie al nono, tu sâs cemût ch’al è fât…” Il cjavut al fâs di sì, plen di comprension par chel nono un pôc stramp che di cuant che i à domandât di no clamâlu plui “nono Odillo” ma dome “nono”… Jan al à dit di sì e di chel dì ali lu clame O d i l l o!!!
di Barbara Battel
#677
7 comments
Lasse une rispueste
Dutis lis contis
Biele suaze dai tiei sintiments, Barbara. Tu jus contis cul cûr. E crodimi o soi un poc invidiôs. Miei fiis par cumò mi àn puartat a cjase dome bestiis. Il cjanut, gjatut, la tartaruce, la cuninute e jo mi contenti a fâ il nono cun lôr. Brave Barbara.
Nello, ancje jo no olsavi domandâ a gno fì cuant…e podopo al è suçedût che Jan al à urût nassi cuant che al à deçidût LUI!!!(mai tant ben …par noaltris nonos furlans e slovens- la mê brût e je slovene -!!!!
L'amor dai nonos sui nevodutz e je che strade lungje che no da mai al voli il sio travuart.Maraveose midisine a tigni inpiade le vite.Lussian
Barbara, i nonos di vuê, e mi met ancje jo, forsit a àn plui afiet pai nevôts di chel che o vi vût noaltris dai nestris gjenitôrs. Forsit al è parcè che a jerin altris timps, cun di mieç vueris e no masse bondance. Di sigûr nus volevin ben di istès, ma cence tancj figotets. Forsit la dolcece e vignive sparniçade fra ducj i fradis e cussì nus tocjave nome une fete. E nus bastave.
Dut câs biele.
Mandi
Barbara, la conte e je di une tenarece che di plui no si po.
Tant Jan come nevodut che voaltris come nonos si meretais un cun l'altri.
Us auguri che la vite us conservi cheste reciprocitât di afiets.
Al è cun grant plasê che o visi chei che no àn la pussibilitât di lei il Messaggero Veneto, che vuê al è stât mandât fûr un biel articul su la cerimonie tignude intal municipi di Basilian, che e à compagnât la presentazion dal libri di poesiis in furlan "Scleses di vite", dal nestri contecurtâr Luciano Marinig. Jo, che o jeri presint, e che o ai preseât une vore lis bielis contis, metudis ju in rime, dutis rivuardant apont sclesis di vite di paîs, o soi plui che content dal sucès che al à vût.
Luciano, ti fâs i miôr auguris di continuâ a lunc a scrivi cussì ben e o speri di leiti ancjemò su Contecurte.
Mandi.
Mi sa tant che ancje Odillo al à di bisugne ognitant di fasi figotà dal frut :D, biele conte fate ben cun il to grand cûr e il lampa' l'aspiet profond da lis robis . Mandi Barbara