La torte

Siore Rose e je vedue di un colonel dal esercit e e vîf intune citadine dal Friûl di mieç, intun grant apartament. E je sot dai otante, ma e sta ben sei di fisic che di sintiments. E à une femine a oris par tignî in ordin la cjase e pal mangjâ si rangje di bessole. Po ben, no mancjant di sostance e plui pe companie che par altri, e decît di cjoli une badante. La agjenzie i mande Ludmila, une siorute Rumene, cun tant di referencis e siore Rose, daspò vêle provade par une setemane, le cjape sù. Ludmila e je brave e volenterose e siore Rose e je contente di jê. Ogni dì, siore Rose e la badante a jessin di cjase tor undis, e a van a cjoli il cafè intal Cafè Grant, in place, juste sot dal sô apartament.
Cuant che e jes, siore Rose e met sù dut il sô aur; golainis, anei, braçalets, spilis, rincjins, ma no par fâ viodi che e je siore, nome par ce che no si fide a lassâ a cjase chel capitâl, cun chês brutis musis che zirin ator.

Po ben, Ludmila e je brave in cusine, soredut cun lis tortis e siore Rose che e je un tantin golose, lis fâs fâ dispès. Ven a stâi che sot lis fiestis di Nadâl, Ludmila i domande ae siore se pues lâ a passâ lis fiestis cun la sô famee e siore Rose, di bon cûr, la lasse lâ.
Il dì de partence Ludmila, alçade ni vore a buinore, e fâs dôs tortis, une pe siore e une par puartâ ai siei fîs, in Romanie.
Siore Rose e à agrât par chest e vûl mangjâ subit une fete insiemi a jê, che tant al è ancjemò timp par lâ a cjapâ la coriere. Ludmila, bielzà pronte par partî, no volarès, ma i tocje poiâ lis borsis e sentâsi. Siore Rose, taiant la torte, e sint dentri alc di dûr. Il prin pinsîr che i ven al è che i sedi colade une sidon intal impast a Ludmila, ma vierte la torte la sorprese: lis sôs golainis, i sôi braçalets, i sôi anei, i rincjins, insome dut il sô aur. Ludmila e ven blancje come un peçot e e tache a vaî, murmuiant cualchi peraule di scuse e domandant perdon. Ce jerial sucedût?, Ludmila ingoloside di dut chel aur, e veve pensât ben di fâ il colp gobo; scuindi dut l’aur intune torte e tornâ in Romanie, par no fâsi plui viodi in Italie. Ma il diaul al fâs lis pignatis
ma no i tapons; je e lasse fûr la torte sbaliade e cussì il malfat al ven subit a gale. Siore Rose, femine di caratar, no si lasse intenerî e e clame subit i carabinîrs, che rivâts a puartin vie Ludmila.

Siore Rose, displasude di no crodi par la brute azion che Ludmila i à fat, e zure fra sê: “Badantis? Mai plui!”

• 

  Anonimo has written: 28 di Dicembar dal 2016 at 12:42 DM Rispuint

  Pauli, ma la vâstu a cirilis? Biele conte, gustose, che us met a cognossince di ce che al sucêt tai nestris paîs. Biele par dabon!
  Nelo
• 

  Galliano has written: 28 di Dicembar dal 2016 at 12:43 DM Rispuint

  Une conte unevore dolce, pecjât che il finâl le fas deventâ mare. Cundiplui lis tantis Ludmila che a popolin l'univiers de gjeriatrie, a partî di cumò e vignaran cjaladis cuntun altri voli. Cui sa cetancj câs di chest gjenar a saran sucedûts. Come lis chechis che dispès a cjapin su robutis che a slusichin puartantlis tal lôr nît.
  Compliments a: Pauli Jacus, par vêle contade in cheste forme.
• 

  Anonimo has written: 29 di Dicembar dal 2016 at 7:34 PDM Rispuint

  I umign di siençe e an cjatat che il pont gardenal NORD al ven simpri plui in ca,dut par cause dal pais di Ludmile e dal pes specific di chel metal preseat. Lussian
• 

  Ludmila has written: 10 di Zenâr dal 2017 at 3:04 DM Rispuint

  Pauli, dar tu și nu am putut să ne vedem la Cafe Grant, sâmbătă după-amiază?
• 

  Anonimo has written: 13 di Zenâr dal 2017 at 11:23 DM Rispuint

  Cui isal il scaletîr di "La torte"?