10 di Dicembar dal 2016

Fotografie in blanc e neri

Gjenar romantic
Presepi 2015 a Talmassons
Par spesseâ a meti jù la scjatule di fotografiis vecjis, ancjemò di chês in blanc e neri par capîsi, la covertorie e sbrisse in bande e une di lôr e svole ben planc par tiere. La cjapi sù e o ài devant dai voi, in prin plan, Odillo cun bocje di ridi, daûr di lui un presepi une vore bocon scuasi come lui: di sigûr e je opare sô, cjalant la voglade braurose al obietîf.
Nadâl, intai agns Sessante, al jere prin e sore dut presepi: noaltris fruts no si spietavin regâi, ma l’aiar che o respiravin al jere di fieste, di puars ma dut câs simpri fieste, soredut intai cûrs. A dutrine il plevan nus fevelave di domeniis dal Avent, di Crist Salvadôr nassût par nô: a jerin, chestis, peraulis ditis in mût enfatic, une vie di mieç tra flabe e misteri. Par me frute però, intal scûr de gnot, cjase cidine, voi discocolâts a rivivi lis senis de zornade a pene passade, il svicinâsi dal Nadâl al jere sintût come la nassite di cualchidun, sì imens ma intal midiesim timp sempliç, un di noaltris. La mê realtât e fevelave di stale a pôcs metros di cjase, intal bearç il polam destinât dome ai dîs di fieste al puest de solite mignestre di fasûi, po dopo e jerin lis cjavrutis e il so lat che mê mari e faseve deventâ sauridis formadielis. A Nadâl, di fûr vie, o vevin il paneton, i mandarins e pomis secjis, nuie di plui, ma di no crodi cetante gjonde par chei mangjâs che o gjoldevin dome une volte ad an!
Il presepi al jere un puartâ intes nestris cjasis il miracul de nassince dal Signôr e al deventave scuasi une opare mestre di inzegnarie cun materiâi di pôc, ma une vore fantasiôs: lis piçulis statuis di Odillo frut a son passadis a Gabriele… e je ben vere che cualchi piorute a si à inçuetade, ma la gjonde di chel palc cumò e je deventade spetacul pai voi di Jan, nestri nevodut, che cence padin al zire e messede i personaçs di continui jenfri il muscli! Vuê a si fevele di letarute a “Babbo Natale” une vere e proprie liste di zuiatui ben bombardâts par television, ma il just sintiment dal Nadâl par noaltris ben indevant cui agns, al reste che gjonde intal cûr che o sintin se ator di no o vin cui che nus vûl ben, un pinsîr di afiet par chei che a no son plui chi, ma e continuin a volênus ben (e nô lu sintìn). Par me la gjonde e je cuant che Jan, par indurmidîsi, a mi domande: “None Barbara, contimi une storie…”
“Quale vustu sintî’?” “Contimi che di Gesù Bambino”
“Alore no, intune gnot frede e plene di stelis al lè nassût un frut, il so papà e la sô mama lu cjalavin cun tant amôr e un bo e un mus lu scjaldavin cul flât: al jere un frut, ma ancje un re….”
Lis palpieris di Jan a van jù plancut intan che une manute a si ten strent al cûr TA e chê altre lu ciareçjie lizere : TA l’ors compagn dai siei insiums…
di Barbara Battel
#640

 

10 comments

  • Pauli Jacus has written:

    Biel chest spietà il Nadâl, di tancj agns indaûr. Mi visi che a si leve a muscli ogni an e po si faseve il presepi. Jo o vevi lis mês statuis e gno fradi lis sôs. Une dì o vin barufât e jo par svindic o ai rot une gjambe a une piore des sôs. No di dîs lis pachis che o ai cjapât.
    Po dopo mi inzegnavi cun la curint e un an o ai metût une lampadine dentri in te capane. Po ben la lampadine e jere masse fuarte e e scjaldave ni vore. Par fale curte, ju pe gnot al à cjapât fûc il presepi e o vin riscjât che cjapi fûc la cjase.
    Barbara, ti mi âs fat tornâ indaûr di plui di sessante agns, gracie.
    Pauli

  • Barbara has written:

    grassis a ti, Pauli! L'"eletric" al jere za intal to DNA, al coventave dome cjapâ la misure dal voltaç just par i puartelampadine di chêi agns! Jo mi visi che la lampadine plui "fuarte" di lusôr" a cjase nestre e jere chê di 40 cjandelis e intai comodins no plui di 15 cjandelis!Mandi!

  • Galliano has written:

    Graciis Barbara.
    Ce biei ricuarts che tu mi fasis vignî in ment. Ancje te mê famee vivint in Friûl, il presepi al jere presint, an daûr an, Sante Luzie nus puartave une piorute, un pastôr o une cjasute di sûr.
    Emigrâts, si lu sin puartâts daûr ripetint ca vie la tradizion dal Nadâl. Dome che vivint in citât nol jere facil cjatâ il muscli, ma o rimedeavin. Chel che no podevin rimedeâ a jerin lis altis temperaduris dal Istât.

  • Anonimo has written:

    Sì lafè 50 cjandelis, a cjase me cuant ch'a si passave 40 al scomençave a lampâ il limitadôr di curint (cumò a si dîs blinkâ), la muse te stale a cuarnâ e il nono a porconâ: "Distude che lûs…" ai diseve a l'ultin ch'a la veve piade. Bepi

  • Anonimo has written:

    Ancje chest al il Nadâl Barbara, cjatât tai tiei ricuarts. Cun di plui ben contât. Buinis fiestis e bon Nadâl.
    Nelo

  • Anonimo has written:

    Ancje chest al il Nadâl Barbara, cjatât tai tiei ricuarts. Cun di plui ben contât. Buinis fiestis e bon Nadâl.
    Nelo

  • Anonimo has written:

    Biele conte Barbara, sensazions che restin stampadis te ment umane cun lapis copiatif e che lis modernis luminaris di vue no rivin cancela. Lussian

  • Barbara has written:

    graciis Galliano e Nello!

  • Anonimo has written:

    Biele conte,moments che si fermin in ment cu le potensie di un lapis copiatif, e che ducj i lusors dal moderni Nadal di vue no rivin cancelà. Lussian

  • Anonimo has written:

    Barbara, altrigo 50 cjandelis, a cjase me cuant ch'a si rivave a 40 al scomençave a lampâ il limitadôr di curint, la musse te stale a cuarnâ, il nono a porconâ: "Distude che lûs.." i diseve al ultin ch'a la veve piade… Bepi

Lasse une rispueste

La tô direzion di pueste eletroniche no sarà publicade. I cjamps domandâts a son segnâts tant che *

This site uses Akismet to reduce spam. Learn how your comment data is processed.