Il gno spieli braurin

2014 -Teme: cincuantenûf, ce diambar puedial contâ un numar?

A son i miei agns, a fevelin a cui che mi cognòs di mê, di cemût che o soi fate, des mês passions, des mês debilecis, dai miei riduçs, des mês lagrimis, des mês ridadis (mai tignudis dentri, e mai stratignudis, forsit, anzit di sigûr, no di siore plene di finece, ma scletis, e purtrop simpri masse da râr rispiet a dutis lis voltis che mi plasarès podê fâlu). Pal fisic no soi cuissà ce, la mê celulite e lis mês formis tarondis no mi angossin cuissà cetant, parcè che mi regali la scuse de menopause ( a lu disin parfin par television!), ma A MI e DI MÊ mi plâs la biade e legre incussience che o met dentri intes tramis de mês birbantadis che stan come une scarpe e une çucule cul numar dai agns. O ‘nd ài frecuentât un cors par imparâ lis fondis de gramatiche da la lenghe furlane e propit alì o ài sintût cun prepotence trop e cetant che mi plâs scrivi, no pal scrivi pûr e sclet, plui di dut pe condivision des emozions che e svolin fûr de pagjinis a imbraçâ, cjareçâ, e bussâ cui che mi “laike” …ohh tropis a no ti cumbiniju?

O ài frecuentâ un cors di narative in lenghe furlane e o soi cussì tant fûr di coce da la contentece di jentrâ intun mont di fantasie e creativitât, (che jo o sint di no vê dentri di mê) che o soi li come une frute che a si divertìs, i miei prof, i miei “guru” e fevelin di “incipit”, di digressions, di credibilitât dal lengaç, di ritmi e jo mi bêf li lôr peraulis, in cierts moments o rivi parfin a fevelâmi dentri in tal gno cjâf e a fâmi di bessole i compliments brauròse come che o soi, parcè che a mi pâr che cualchi volte a le ài induvinade cence savê, in plui di une conte che a mi à capitât di scrivi! Us prei però di no contâlu in zîr, parcè che se no il gno om mi fâs une biele strapaçade e lis sôs paternis a son piês di un seglot di aghe glaçade! Cun di plui, su sugjeriment di un altri prof o stoi leint tant di scritôrs e scritoris furlans e o stoi gjoldint une vore, di gjonde di frute, se pûr none, cundute la amirazion pe lôr braùre in tal savê a pandi lis emozions e lôr sì che a san a fâlu, lu fasin di Diu! Par vuê Barbara e à gjoldût avonde in tal tornâ a scrivi dopo vê riscjât di pierdi l’ordenadôr cundute la sô memorie, cuntune part (chê di frute, chê di femine, chê di none) di Barbara… Battel…
Cheste o soi jo…spudade… in anime e corpite (cussì e diseve none Aurore)

• 

  Anonimo has written: 26 di Novembar dal 2016 at 6:26 DM Rispuint

  cjalantmi tal spieli.
  Nelo
• 

  Anonimo has written: 27 di Novembar dal 2016 at 6:09 PDM Rispuint

  Il me spieli braurin
• 

  Galliano has written: 27 di Novembar dal 2016 at 1:30 DM Rispuint

  Barbara, biel chest to scrutini.
  Par me il titul, ancje se al somearès un tant frêt al è:
  – Introspezion –
• 

  Anonimo has written: 27 di Novembar dal 2016 at 4:46 DM Rispuint

  " Cuant le anime sa viesti il so cuarp". Lussian
• 

  Anonimo has written: 27 di Novembar dal 2016 at 6:37 DM Rispuint

  Par me: Une none di gale. Bepi
• 

  Massimo Furlani has written: 28 di Novembar dal 2016 at 7:22 PDM Rispuint

  Sledrosâsi
• 

  Barbara has written: 28 di Novembar dal 2016 at 9:56 DM Rispuint

  Nelo, Anonimo (forsit Nelo 2?), Galliano, Lussian, Bepi e Massimo grassie di cûr par i titui che o vês pensât par la mê conte. Mi vês viodude un tic "impegnade" o "freudiane", cualchidun mi 'nd à conseât di no jessi masse "vierte" di tignì par mê lis robis plui "intimis" (e lu fâs par il gno ben). Grassie di cûr par vêmi puartade a scuvierzi il gno titul…((((JO…SPUDADE…IN "ANIME E CORPITE" e disé None Aurore)))
• 

  gelo has written: 29 di Novembar dal 2016 at 9:16 PDM Rispuint

  Ae fin alore, ce metino?
  Anime e corpite
• 

  Anonimo has written: 29 di Novembar dal 2016 at 10:00 PDM Rispuint

  No, no… miôr "il gno spieli braurin" come che al diseve l'anonim.
  Nelo
• 

  Barbara has written: 29 di Novembar dal 2016 at 10:58 PDM Rispuint

  Rafael, o azeti il titul dal Anonim Ti domandi però di zontà in somp a la conte:"Cheste o soi jo…spudade… in anime e corpite (cussì e diseve none Aurore)