No plui nô

Dopo tancj agns passâts cun jê, pierdût come che no jeri mai
stât di nuie e di nissune prin, o jeri content di vê almancul un pont fis te mê
vite. Par me e jere dolce e fofe tant che un pic di garoful che al cambiave dut ce che mi capitave intune tonalitât pastel. O jerin tant diferents, ma par
chest si strenzevin in ecuilibri, o jerin un struc di oposizions tant biel, ma
tant facil di rompi. O vevin un sintiment inocent e fuart, di fruts, che no sai
se al tornarà mai a fâsi viodi des mês bandis, stant che le sintivi come un gno orghin vitâl.

Intun lamp e je rivade une tampiestade di lagrimis.

Sô mari e murì. E jere une femine che mi dave simpri il bon acet a cjase sô, mi faseve mieze muse di ridi e, si ben che o jeri l’ultin rivât, mi voleve ben te maniere plui furlane che e je, ven a stâi cui fats e no cu lis peraulis. O cjatavi une altre cjase vie di cjase. Cul so fâ mai content, a ore di cene mi diseve: “Vuê tu colis mâl.”, “O ai pôc.” o ”Nie bon, nie bon.”
Dut chest al jere aromai une tradizion legre, come intune comedie là che ancje se lis mascaris a tornin a ripeti lis lôr parts di agnorums, i atôrs no molin mai di gjoldise. E doprave la stesse maniere di fâ, ma cuntune ponte di severitât che cun me no veve, ancje cu lis dôs frutis che e à finît di tirâ sù
di bessole.

Dut chest al finì di bot te criure di une matine di Dicembar.

Dopo tantis lagrimis, tal moment di cirîsi, si son fatis viodi lis bausiis, soredut sôs, e ancjemò altris lagrimis, ma cheste volte soredut mês.

Cussì mi cjati di bessôl cu la scovacere plene di sclesis di cûr. Ancje se no dovarès, mi domandi cemût che e sarà jê cuant che chel che si le à puartade vie nol sarà plui une novitât. Ma chescj a son resonaments che a fasin dome chei che ur ven consegnade la scovacere in man.

La vite e je licuide, e cambie simpri, si môf, e tancj mi disin di no vê pinsîrs, che dut al à di passâ. Al è vêr. Un si piert ingusît a fâ i conts cul Karma, sperant che cualchi fuarce e rivi a meti un pês sul plat just de belance. A soreli jevât a disin che cuant che un uciel al è vîf, al mangje lis furmiis, ma cuant che l’uciel al mûr, al ven mangjât des furmiis: pa nô, che no sin plui un “nô”, la spere dal timp e à ancjemò tante strade di fâ. O cîr di no domandâmi cui che e jere chê anime che o ai vût dongje di me par tant timp, une che vuê no capissarès plui. Se l’aiar al è fuart, al siere i barcons, no si pues cjapâse par chest. Cussì o capìs che ancje l’amôr al à di finî e no si pues cjapâse. Lis bausiis dut câs, mi fasaran simpri mâl.

Dopo de tampieste, al varà di saltâ fûr il soreli ancje par me.