Never Stop Discoteque II

Ta chê sere i amîs a vevin puartât Toni intun biel ambient dulà che la bire e coreve a flums e la musiche e jere otime: un complès di Berlin al sunave alc a miezis tra il punk dal ’77 e il dark/kabarett cun influencis di Kurt Weil. A jerin dôs cjantantis biondis che a saltavin su la taule; une e veve un cjapiel a ûs chel di un carabinîr e chê altre un piton ator dal cuel (no un sarpint, insome, o vês capît, un boa di struzzo). La sdrume di int e jere cussì fisse che a un ciert pont Toni si cjatà strenzût tra tancj zovins. Si zirà e al sintì un profum scuisît, come di forment, di panolis… a jerin i cjavei, i cjavei di une biondine; e varà vût sui vincj agns; alte un metri e sessante, une musute palide e semplice. E jere tacade di lui. Al durà cualchi minût chel incjant: sintî il profum dai cjavei de fantate…Toni al jere imbaraçât… nol saveve ce disi, al voleve fevelâi, disi che i plaseve il profum dai soi cjavei ma dopo e je lade cemût che e je lade e la zovine e je stade traspuartade lontan di lui de curint di int dal public, intant che il conciert si indreçave intai “bis”. No le viodè plui.

Agns dopo Toni al passe in biciclete intun cjalt Jugn di cjamps di forment, bande dal Tiliment. Al viôt un tor isolât. Si vise di chel paîs: al è il paîs dulà che al è chel ambient. Viodìn se al esist ancjemò. Cuatri zovins in biciclete a vegnin fûr di une boschete; a àn struments musicai, ghitaris e bongos… a saran lâts a sunâ a ôr dal Tiliment, al pense Toni, e magari a fâsi cualchi canon. Cun lôr al e ancje un cjan. Par un cualchi istant si sint part de clape, dopo ju sorpasse e al rive li dal ambient. Sierât. Desolât. Al jere di disi. Une bandarole cu la insegne e sdrondene intal aiarin. In Toni si vierç la icone mentâl di chê sere dal conciert… al cjale i cjamps di forment a ôr di chel biel paîs e si vise di cuant che al veve sintût l’odôr di cjavei di chê biondine… a savevin di forment.

• 

  Galliano has written: 26 di Lui dal 2016 at 2:07 DM Rispuint

  Checo,
  In pocjis peraulis ti dîs che mi à plasût. Biele.
• 

  Barbara has written: 26 di Lui dal 2016 at 10:07 DM Rispuint

  forsit la biondine e jere stade ancje a fâ una cjaminade (????) lì in zîr prin di lâ a scoltà la musiche… Biel lei e scoltà i pensîrs che jessin a un zovin cuant che al vîf une emozion, un profum di forment intai cjavei di une frute…Mi 'nd à plasût un grum!
• 

  Anonimo has written: 13 di Avost dal 2016 at 9:26 DM Rispuint

  Ma sino sigûrs che chel pote che al à sintût odôr di forment nol sedi stât un vieli?

  Hauptmann Thieme
• 

  Anonimo has written: 14 di Avost dal 2016 at 7:24 PDM Rispuint

  E se fos stade une mulinarie?Lussian
• 

  Anonimo has written: 10 di Setembar dal 2016 at 9:03 DM Rispuint

  Une mulinarie? Buine cheste! Tu sês just! Uah Uah Uah 🙂 😉

  Hauptmann Thieme