Milions di agns

Cent e cincuante milions di agns? Pôc plui pôc mancul. E jere une dì come une altre suntune anonime splaze dal mâr di Tetide. Il soreli al brusave e ai grancj sauropodis nol restave altri che butâsi inte aghe. Cu lis grandis codonis a movevin il licuit provocant des ondis che a levin a rompisi cuintri la cueste. In cîl a planavin variis formis di pterosaurs, grancj, mezans e pitinins. Si butavin jù tal mâr a predâ riscjant grues des voltis a cause di cualchi crocodîl in vuaite. Un piçul brontosaur (o alc che al sameave a un brontosaur) al veve decidût di esplorâ la splaze par so cont ma a un dât moment si cjatà di front un minaçôs theropodi cjarnivar… le varès viodude peloche se nol fos rivât in jutori so pari che, cu al potente code, i molà une biele vuiscjade al agressôr. Insome, cheste volte e jere lade drete pe famee dai brontosaurs. Il theropodi, dopo di chê sdrondenade, nol veve plui olsât fâsi viodi di chês bandis e al jere restât a bocje sute.

Cent e cincuante milions di agns dopo, simpri tal chel mâr, ancje se al jere cambiât alc. Toni e Meni, vedranons cence remedi, dopo di un bagn si jerin distirâts sui jetuts a cjapâ soreli in chel di Lignan. A sintirin une vôs berlâ: “Cocco freshco, cocco bello, cocco di mamma!”
“Lu sintistu Meni? Âstu gole?”
“Mah? E se tal servìs dopo jessisi tocjât il bigul? Âstu mai pensât? No ise miôr une bire?”
“Mi sa che tu âs reson, Meni… ancje par mitigâ la scalogne!”
“Sì, Toni: e je pocje frice ca ator ma usgnot o cumbinarìn cun cualchi todescjone in discoteche, fiditi!”
Tal cîl a svolavin dai acuilons narançons e un grant parecjadudis zâl; pôcs a jerin i cocâi… a preferivin lâ a pasturâ bande dal Tiliment.

Cualchi milion di agns plui tart e jere une dì di soreli inceant. Al jere simpri il stes mâr ma cuntun nivel di idrocarbûrs une vore elevât. Su la splaze a jerin a cjapâ soreli dai grancj organisims colôr viole a ûs amoebis…, sì, pensait però a amoebis cuntun diametri di cinc metris! Inte ombrene a parevin come dai balons dûrs e secs ma apene che lis scjaldave il soreli lôr si slargjavin deventant molis e inglobant altris organisims plui piçui. In cîl a svolavin dai pes… be’, pes e je une peraule gruesse: no sameavin tant ai lôr progjenitôrs, i pes volants…
Si butavin jù tal mâr di idrocarbûrs par passisi di cualchi altri mostri. Sì, e jere une zornade come une altre in rive al mâr.

• 

  Anonymous has written: 1 di Avost dal 2012 at 4:14 DM Rispuint

  Mi plas il flash spazio-temporal!
• 

  gelo stellato has written: 2 di Avost dal 2012 at 4:43 DM Rispuint

  Checo, âstu finît di comentâti di bessôl come anonimo! 😀
• 

  Anonymous has written: 4 di Avost dal 2012 at 6:59 DM Rispuint

  No soi migo jo! Tal zuri!
• 

  ateliersommarti has written: 6 di Avost dal 2012 at 2:50 DM Rispuint

  Ah m'impensi di chel ch'al lave sú e jù pe spiaze a vendi chel cocco di mamma che nissun nol voleve. Chest mi fâs pensâ che forsit le storie no é di vuê ma no puès sei di stès vecje di cent e cincuante milions di agns.In chel timp, il livel dal mâr al cuvierzeve di sigûr ancje i monts de Cjargne che forsit a si cjatave in tune altre bande dal mont e che forsit a no si cjatarà plui di nissune bande tal nêri futûr che Checo nus piture.
• 

  Anonymous has written: 6 di Avost dal 2012 at 6:48 DM Rispuint

  La sere, i doi sfigâts e son lats a mangjâ une pizze li dongje, il côgo al tirave ju dal cjamin, chel sore la bocje, surîs di chilo. Ce buine che pizze, di fàt e veve un savôr dut speciâl.
  Par furtune, su le spiagje, le vevin scjampade propit biele!
• 

  Anonymous has written: 6 di Avost dal 2012 at 7:02 DM Rispuint

  O jerin pardabon tal mar interni, l'unic de tetide, di sigûr ancje la sù nol iere il Canin, pitost il nestri Friûl al steve dentri tun mâr pôc profont e cialt, un mâr par capîsi come les Bahamas di vuê.
  Po, ben planc, une pocade daûr che âtre, al e spontât un space cocco.
  Mandi a ducj Maurizio Di Fant