Juste! Chei di vuê a i larès taiadis lis vorelis, no si meretin di scoltâ nuie, parcè che dome la…
In spiete
Al jere daûr a cricâ il dì, dopo une gnot lungje e frede dulà che Anute e veve durmît pôc, te ansie di no rivâ a jevâ, in scolte di un cualchi rumôr, di une clamade, di une lûs che si impiave.
Ma nuie, il scûr al jere passât e di gnovis inmò nissune.
Cumò, tal clip dal so jetut, e veve viert i voi e e spietave che sô mari le clamàs. Ma vignude jù a bas no viodè inmò nissun.
Si impensà de sere prime, di chê puare bestie che ju cjalave come par dî «Judaitmi», e che ae fin si jere butade par tiere, sfinide, e lôr no vevin podût fâ nuie, se no lassâle al so destin.
Anute e jere corude vie te sô cjamarute cu lis lagrimis cjaldis che i brusavin i smursiei; i siei no vevin nancje provât a clamâle, savint trop che e pative par vie di chel afiet cussì profont che le leave a chê bestie, e che cumò e riscjave di pierdi.
Ce fâ cumò? e pensave tra di se, combatude tra la gole di savê e la pôre di vêle pierdude. Si incjaminà viers de arie, dulà che si viodeve la lusute che so nono al veve lassade impiade par caritât di chê puare bestie soferente, come par judâle ta chel moment di trapàs a no sintîsi bandonade.
Ben planchin e rivà insom e si impensà dai tancj moments passâts insiemi, dulà che Anute i contave di se, de sô vite, di ce che i sarès plasût fâ e la bestie le cjalave, dant segn di capî dut e di condividi cun jê la gjonde o i dolôrs.
Cumò, te pôre di pierdi chescj moments e di no viodile plui, e jere blocade devant de puarte, in spiete di un cualchi rumôr che i disès chê Bisje no jere lade vie, parcè che jê, tal so mont di frute, e veve inmò bisugne de sô compagnie.
Dentri l’aiar al jere cjalt, umit, e i odôrs a jerin fuarts, come ogni volte che Anute e jentrave la dentri: odôr di fen, di blave, di lat. Ma cheste volte al jere alc altri che e sintive ma che no rivave a capî ce che al fos. Lis lagrimis a tacarin a trimâje tai voi, intant che si zirave a cjalâ tal sierai dulà che a vevin lassade Bisje la sere prime: e scugnî tirâsi sù su lis pontis dai pîts par rivà a viodi dilà dal breâr, ma a pene che e poiâ lis mans sul len… i siei voi a deventarin inmò plui grancj di ce che a jerin! Par tiere, tal mieç dal fen sparniçât ator par dut, e jere la sô Bisje che le cjalave; ma i voi de bestie, a pene vude la conferme che Anute e jere li cun jê a condividi chel moment, si spostarin come par mostrâje alc. Li in bande, poiât a mieç su lis çatutis finis al jere un vidielut, bagnât e spaurît, ma plen di voie di tirâsi sù, di cori incuintri a chê frutine pene rivade par dîje «Ce meraveose che e je la vite!»
di Rosute
#186
6 comments
Lasse une rispueste
Dutis lis contis
Ce biele conte, Rosute! A somee tant ai ricuarts che a mi e me sûr, che vîf in Canadà, a nus plâs contâsi lis voltis che je a mi telefone. Un dai ricuarts al è chel da la vacje Bise di gno nono che a saveve ben je dolà fermâsi, cence nancje dai un segnâl. Denant une ostarie, veh, parcè il nono al veve di là a bevisi un taiut.
A pene che si sintarin cun me sûr o ai da leile, cheste conte.
Grazie Gjovane!
Ancje jo o soi partide dai miei ricuarts par scrivile, mi è vignude propit dal cûr.
P.S. ducj a àn vût une "Bisje" 😉
maman
Ben scritte. Po dopo a to' jè il cûr.
Tocje. Domandi perdon
Pardabon chest mont, che tancj di nô e an pasât cuant che jerin fruts, al jere plui vêr, plui vîf, di sigûr ancje plui dûr, ma cence atri e a diference di vuê, plui dongje de nestre umanitât. Brave Rosute de bande di Maurizio DiFant
Grazie Nelo e Maurizio,o soi contente che us sedi plasude la conte. Jo cheste realtât o soi rivade a viodile par un pêl, po dopo e je rivade la globalizazion, la television, chê smanie dai furlans di someâ di plui a "chei altris" e cumò…no sai se o sin miôr o piês.
Ogni ben