Cirint la lune tal Stele

Prissinins, ai 13 di Dicembar dal 2020
Curt pe presentazion dal Lunari 2021 de Associazion Anaxum

O pensavin di cumbinâ dome l’event des premiazions dal Concors Vôs de Basse, in chest 2020 disgraciât, e invezit… o vin tirade dongje une altre iniziative.

Sì, parcè che al è sucedût che chei de associazion di fotografs Anaxum, di Prissinins, a vedin metût adun il lunari dal 2021 e nus vedin domandât di dâi une man a presentâlu sul web. E cussì, fevele discut messede matee, e je saltade fûr la idee di un curt, cu la poie regjistiche e dal shooting di Michele Carrara, dai Actionstudiofilm e cu lis musichis des ConFusione. Lis fotografiis di doprâ a jerin chês dal Lunari e par ogni mês e jere ancje une poesie di autôrs che a vevin a cefâ cul flum (sì, sedi i autôrs, sedi lis poesiis).

Al mancjave tirâ dongje une senegjadure di contis curtis e cui miôr dal Ostîr… Cussì, su sugjeriment de Coghe Fuguline, ma soredut cu lis tindincis dark che il bon paron di Contecurte al à, a son vignudis fûr trê storiis, che dentri, ancje se no ducj si son inacuarzûts, a vevin lis poesis dal lunari. Par jessi precîs, une poesie di Giacomo Vit, une di Elio Bartolini e une di Stefano Lombardi.

Cun di plui, invezit di trê storiis, al Ostîr i è saltade fûr une storie sole, in trê ats, une sorte di (timp indaûr + îr + vuê) che ancje se un tichinin maluseriôs nus pâr vignut ben e gjoldibil. Lu podês scoltâ intal curt che si cjate su Youtube o ancje su la nestre Ostarie, ma se o volês lei lis storiis e lis poesiis ve chi sot il leam par podê scjamâ il dut in pdf.

Il lavôr, soredut tignût cont che al è stât metût adun in pardabon pôc timp, al è saltât fûr une vore ben, e al misture musiche, contis, poesie e fotografiis in maniere ecuilibrade. Podopo a son lis musatis dal Famei Checo, dal Ostîr Rafaêl e de Coghe Serene che a ruvinin dut… ma insome, no si pues mighe fâ dut ben?

Riferiments

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît