CDC07 – Pivide

CDC07 – Pivide

Tal prin, al pensà nome di jessi strac.

Lis peraulis no i vignivin plui fûr di bot e sclop, no, e jere dute une fature. E jessevin a butadis, tant che i passarins bagnâts daspò dal burlaç: e tentavin di svolâ e tic e tac e colavin ju par tiere. Ogni frase i restave sierade in tal cuel, cuntun piçul sfris, une eco no finide. Fevelâ, par lui che al veve simpri vivût de sô vôs, al deventà une fature.

Il miedi al riduçà. «Pivide. Il malan dai uciei».

Al sclarì che e ven cuant che le lenghe si fâs pesant e il cjant si scurte. «Nuie di mâl», al disè. «Ma al varà di fermâ di sfuarçâ il svol».

Lui nol capive. Anzit, al cirive di sburtâ fûr peraulis, di bati lis alis cuintri l’aiar penç. Lui al voleve spiegâ, convinci, rispuindi a dut. Ma, plui che si ustinave, mancul rivave a fâsi intindi.

Une dî, di bot, al tasè.

In principi al fo dal dut involontari. E, daspò, vie vie, cussient. Biel planc al capì che lis peraulis no proferidis si poiavin lizeris su lis robis, e li e cjatavin cjase. Lis olmadis cjapavin il puest des peraulis. Lis mans si fasevin simpri plui precisis. Lis polsis, impen che vueits, e deventarin spazis.

Le pivide, al scuvierzè, no jere un difiet de vôs. E jere un promemorie dal respîr.

I uciei no cjantin par sclarîsi: e cjantin dome cuant che l’aiar al è just. Pal rest, e tegnin di cont il flât.

E cussì al imparà che ciertis peraulis, tant che cierts svoi, e vuarissin dome spietant il vint.

di Gelsomini – peraule clâf: Pivide
#1894

4 comments