CDC05 – Tal grim

CDC05 – Tal grim

Tal grim dal Invier si impie un lusôr, tal fis dal bosc si dan dongje i salvans e lis aganis, intune largjure a jevin faliscjis e a van viers il cîl.

Il lunari al segne il prin di Fevrâr: o sin a mieze vie tra l’Invier e la Vierte: lis gnots plui lungjis dal an a son passadis, un lusôr gnûf si invie e al dâ vite a lis pividis sot tiere.

Milenis indaûr i Celtis a vevin dât a chest timp il non di Imbolc, che al vûl dî “tal grim”: la faliscje che tal cûr dal invier e impie la lûs che e torne, la puarte, il soiâr de gnove stagjon.

La dee Brigid e jere la regjine dal fûc sacri. La sô bielece e jere radiose e i poetis la riverivin. 

I siei fedêi a veneravin la nature, lis risultivis a jerin consacradis a jê, ma ancje il fûc dal fogolâr e lis faliscjis de farie. E jere une savinte e une vuaridore.

E gjenerave l’agnel tal grim de piore, la pivide tal grim de tiere, il fûc creadôr e purificadôr, la aghe che e lave e che e dà vite.

Inte ete cristiane i siei fedêi no si jerin dismenteâts di jê: cumò la preavin cul non di Sante Brigjide di Irlande, e a instreçavin piçulis crôs di lescule par domandâ la sô protezion.

Ma chestis liendis antighis ce puedino volê dî ta cheste ete che e à dismenteât, scancelât dal dut la sacralitât de nature? 

Il scûr al è penç e al somee che si infississi simpri plui. Nui neris si ingrumin tal orizont. Ogni dì une gnove vuere, un gnûf dispotisim, une gnove prepotence. Chei che a domandin pâs e justizie a vegnin fermâts, cidinâts, clamâts teroriscj, ancje se a son i unics a scombati cuintri dal terôr, des ombris de vuere e de distruzion.

Ma ancje tal grim al è dut neri. Ancje dentri dal ûf al è scûr. Il principi di une gnove vite al è simpri involuçât te scuretât. Bisugne lâ indevant a cirî cence lassâsi butâ jù, striçâ i voi par viodi la faliscje plui piçule, e stiçâle e dâi fuarce par che e cressi, judâle a dâsi dongje cun altris faliscjis, fin a fâlis deventâ un fûc, une farie di vite gnove, par sperâ intune gnove primevere di pâs. 

di Garbatella – peraule clâf: Faliscje
#1892

3 comments