CDC04 – Grop

CDC04 – Grop

La peraule grop mi fâs pensâ simpri a un alc di brut; esie ancje par vualtris cussì?
Di frute jo o vevi i cjavei luncs e si ingropavin ancje li da la cadope. Un dolôr che mai! E cussì ogni volte che mê mari mi petenave.

Cuant che il mio omp al frache la spese intalis sportis, chês che a van in nuie dome a cjalâlis, al fâs un biel grop, ben strent. Cui lu mole? Jo o ai simpri cualchi griture intal poleâr e no rivi mai a disgropâ.

Ogni mês une fieste e ogni fieste un dolç a pueste e, jo o soi golose, ven a stai che no mi tiri indaûr. Ma cumò che o soi plui vecjute, se o pari jù alc di plui, mi ven un grop sul stomi.

Ma vuê une fantate mi à regalât un cûr. Lu à fat jê dome par me. Al è fat di cjarte cuntun dissen: soi jo cun David Bowie e o sin leâts par simpri cuntun simbul, sin ben piturâts, cui voi sierâts e intal cîl, cun a plen di stelis.

A pene che la mê frute mi lu à dât, (jê e la fantate a son tant amiis e si viodin a scuele ogni dì) mi è vignût sù un grop. No chel da la cadope, no chel da la borse e nancje chel dal stomi. Lu vevi intal cûr. Daspò o ai sintût alc che si smolave, alc di biel e o ai vût voe di scoltà Space Oddity e Starman.

Vuê Letizia mi à disgropât il cûr.

di Villa Fiorita – peraule clâf: Grop
#1891