LCPBDM #7.1 – Vilie di alc

Auguris, ti dîs la comesse, intant che tu jessis dal supermarcjât cuntune sporte di mangjative svelte e un bevi di un blanc e un neri.

Auguris… di ce, tu pensis par un marilamp, ma dopo lis lûs coloradis e rimpinadis di ogni bande, dai peçs ai barcons, a ti fasin poiâ i pîts par tiere… Auguris di Nadâl, clare. Cemût no inacuarzisi che… o sin rivâts a Nadâl?

Tu vuidis ben planc, lant viers cjase, cul umit che al bagne l’asfalt, e al pâr che la consapevolece de fieste ti sclici jenfri des sôs sgrifis. Cemût podevistu jessi cussì fûr di no rinditi cont che Dicembar al è daûr a disgotâsi intal an gnûf, par lassâsi daûr de schene la molcjare di cheste fieste che no vûl dî plui nuie, par nissun. No par te, almancul, soredut cumò che tu sês tornât a stâ di bessôl.

Yule Goat in Gamla stan in Stockholm, Sweden – Lachy

E intant che tu tiris jù la spese ti cole intor inmò une volte il pês di cheste fieste cetant umane e cetant pôc religjose… No ti è mai plasude.
Jê, chê che fin a un mês indaûr tu clamavis murose, no je plui a stâ cun te. E stant che jere jê a tirâ fûr balutis e lusutis e cjandelutis di sparniçâ ator pe cjase, nol è un câs che no tu ti sedis inacuarzût di nuie. E al podarès someâ un moment di maluserie, di ingôs, di solitudin. Un di chei moments dulà che une relazion e finìs e si fâs fature a tornâ incà, a cjapâ sù i timps di un vivi diferent. Ma nol è cussì. Tu sês content di no scugnî lâ al cenon dai siei, a fâ fente che ti plasi mangjâ e bevi e zuiâ di tombule e sintî chei discors simpri compagns, un Nadâl daûr chel altri. Par jessi sigûr che i tiei no ti invidin al lôr, di cenon, cun to fradi cjastron e i tiei nevôts viziâts, no tu jal âs nancje dite, che si sês lassâts.

E se usgnot tu stâs a cjase, cuiet, tu âs za pensât che doman di sere tu fasarâs un scjampon ta chê fieste stupide che i tiei compagns a fasin a ogni Nadâl, par dâ vie i regâi che no plasin a di nissun.
Tu ju âs ancje tu, di dâ vie, sedi chei di chest an, sedi dal an passât e l’an passât di là. Robis che no tu âs mai dopradis che ti veve cjoltis jê.
Forsit i voleve inacuarzisi prin, che ti cognosseve pôc.

Ma cumò, in cheste Vilie, tu fasis une robe che ti è simpri plasude. Lei lis classifichis di musiche de fin dal an e scoltâ cualchi disc che tu ti sês pierdût, che no tu cognossis… E je simpri stade une tô manie e mai come chest an e je une maniere di meti tal camarin la vite di îr e scomençâ a tirâ fûr chê di doman. E la prime robe che tu scoltis e je za bielone, forsit cuissà… la cjançon plui biele dal mont.

When You Tie Your Hair Up, Dove Ellis; Blizzard [2025] 4’28”