O sin chei des stradis bassis, des rostis, dai rivâi.
O vignarin a cjatâus intune gnot di scûr di lune, di scuindon, tucant te puarte daûr, chê che e cjale lis boschetis.
Us puartarin une grampe di nêf de vuestre infanzie, di chei Inviers luncs che ancje lis stelis a trimavin di frêt tal cîl.
Tes vuestris cjasis clipis al jentrarà par un moment l’odôr de nêf: il ricuart di une aventure, di matinis passadis a sgliciâ cuntun sac sot dal cûl, cence pinsîrs di scuele, e a balonâsi cu lis manecis di lane, strafonts, e dopo vie a scjaldâsi dongje dal spolert, intant che la mame us preparave il lat cu la cjocolate.
Si visarês di chê grande neveade, dai vuestris voi plens di maravee, e o pensarês: parcè si fasino monuments dome aes batais e ai muarts in vuere, e no a chês zornadis che dut il mont al someave jessi in vacance, e ancje i grancj a someavin tornâts fruts? E par un moment a vevin metude in bande la premure, il lambic, la maluserie, la monotonie di ogni dì.
Alore forsit un artist al provarà a sculpî la piere blancje, e al rivarà a fâle someâ fofe tant che un grun di nêf.
E varà olmis di ucieluts e talpadis di canais che a corin a fâ sù pipinots. Si viodarà il passaç di chei che a van a judâ il vicin a palâ la nêf. E une talpute, une sole, chê di un gjat che al veve metût il pît fûr de puarte, ma tornât subit dentri a ronceâ dongje de stue.
E chest al sarà il monument de Grande Neveade dal Otantecinc.
di Stralunade
#1842
