BOOOOOOOM!!!

O scomencìn chest 2025 cuntune tonade!

Parcè? Parcè o vin pensât che par sierâ in bielece la CorseCurte24 al coventave fat un event di pueste e alore…

SABIDE AI 8 DI FEVRÂR

A TALMASSONS

AES 18.00

LI DAL AGRITURISIM PITUEL

TU SCRIVARÂS UNE CONTE!

Un spetacul-premiazion-fieste par tirâ la ultime glagn de CorseCurte24, la competizion di leterature furlane curte plui innomenade dal Friûl!

No savês ce che e je la CorseCurte24? Ma dulà sêso stâts intal ultin an? Di Zenâr a Dicembar 2024, mês par mês, 31 autôrs si son sfidâts in forme anonime a colps di contis curtis. L’Ostîr i diseve: “Tu scrivarâs une conte…“ e si deve il teme. E di li a son saltadis fûr passe 300 contis, lis classifichis mês par mês, vincidôrs di tape, di stagjon e ancje di dute la corse dai mus a tapis.

E alore, ai 8 di Fevrâr a sucedaran un biel pocjis di robis.

1. DISVELAMENT! Ven a stâi che o disvelarin cui che a son i mus e lis mussis che a àn partecipât ae corse platâts daûr di un sorenon. Nonio, Catine la Nere, Muspilli, Nevio, Glorious Grene, Brene Sfolmenade, Bultrik, Vercingetorix, Derna, Nevio, Teresine la çuete… cui si platial daûr di chescj e tancj altris non di bataie? Vignêt e lus scuvierzarês! E no stêt dî che no sês curiôs…
2. PREMIAZION! Stant che lis posizions in classifiche no jerin dal dut definidis e no vin ancjemò publicât la classifiche di Dicembar che e sancìs lis classifichis definitivis. Le disarin ta chê sere, insiemi cun dutis chês altris! O darìn fûr i premis par ducj chei che ju àn vinçûts.
3. RADIO! O varìn tant che ospit Radio Onde Furlane, comari di dute la corse, che no podeve mancjâ in cheste ultime tape!
4. LETERATURE! Us darin une biele cerce des miôr contis par fâus vignî gole di leilis e gjoldisi il gust di sintisi contâ une biele grampe di storiis.
5. FIESTE! O sarin in tancj, de Osterie, e insome, o profitin par cjatâsi e fâ une orute di fieste, che al è biel ancje cjalâsi in muse, ogni tant, e no dome sul web.
6. SORPRESIS!!! Come simpri, no us disvelin dut, ma o tignin tal grim cualchi sorprese. Sorpresonis! Cuissà… Vignî par savê
7. CENE!!!!! E dopo il spetacul, aes 19.30, o vin metût adun une cene, simpri chi di Pituel, (che aromai e je une tradizion), par cui che al vûl, par gjoldisi la seradi fin insom. E nol podeve jessi diferent, e sarà une cene furlane. Afetâts, un prin, il tris furlan (frico,brovademuset, salamasêt), aghe e vin a 25euros. E tal câs o vin ancje la opzion vegeatariane. Par prenotâsi mandaitnus une mail dentri di joibe ai 30 dis, par podê visâ chei dal puest di trops che o sin. O podês invidâ e puartâ cui che volês, clare (ve ca il pdf di scjamâ Tu Scrivarâs une Conte! se o volês zirâlu ator).

Nus pâr avonde… Ancje masse forsit!

Us spietìn!

Chei di Contecurte