Su la strade par Madrîs

I automobiliscj a corin come mats su cheste lungje strade contornade di arbui e dopo, cuant che a viodin une di chês, a ralentin. Si fermin. A contratin. Lis cjariin o pûr a van vie. Une storie che si ripet di secui e secui, fin dai timps dai Romans e dai Grêgs, fin dai Assîrs e dai Babilonês, dai Egjizians e dai Ebreus: baste viodi su la Sacre Bibie la storie di Tamar che, cuvierte di un vêl, e veve fat fente di jessi una putane par fâ un ingjan a so missêr che al jere lât cun jê no savint che e jere sô brût.
E jo, erêt di une tradizion vecje di milenis, vuê o soi cjase di vore, in tour, e o ‘nd ai brincade une interessante!
O rivìn a une strade blancje. O fermi il gno SUV eletric. Jê si tire vie lis mudantis e lis met sul cruscot. Po si sisteme in chê maniere clamade posizion thailandese, ven a stâi a gjambis largjis. Mi plâs cheste forme di complicitât. Mi rint cont che o stoi complint un at impuartant. Nol è dome un gno sbroc. Ma o vin ancje fevelât. Mi à domandât se o soi sposât. Chest prime dal at.
La sô piel e je blancjissime, nancje une bielece a rompi il cjandôr. E à ancje un pet prospar, toront, come chei dai films. E je morbide. Un paradîs.
Il so profum come di fueiis secjis, tabac o corean.
Lis sôs gjambis mi volucin come i tentacui di un grant folp. A un dât moment però, cuant che o soi dentri di jê, e capite une strane robe. Di bot e sclop e samee come muarte!
No si môf plui. O jes daurman e o tachi a dâi cualchi lizêr pataf in muse par fâle rinvignî.
Nie di fâ. Dopo però o capìs.
No je mai stade vive.
E je un gjinoit! Feminin di androit. Insome, une pipine. Cumò lis fasin tant ben che no tu lis distinguis des feminis veris. E i rucui a fasin afarons cun lôr. O vevi let alc su Internet.
Ma propit no crodevi che a fossin cussì perfetis e che a fossin rivadis ancje ca di nô, metudis in spiete su la strade di Madrîs.
Perfetis fin a un ciert pont… bisugne viodi che la baterie no sedi dongje a finî!

di Pieri Moràs
#1840

3 comments