CC24Novembar#11 – Fumâ le beche

#11 – Fumâ le beche

Cuant che il Mont al jere zovin e l’om ancjemò nol jere stât creât (par chest le clamavin le Ete di Aur!) dutis lis plantis e i animâi a podevin tabaiâ fra di lôr e vivi di lusso. Cumò no lu fasin plui, juste par une cuistion di oportunitât: ce tantis blestemis che ur scjamparessin fûr dal mustic, pal mût che o vin ridusude le Tiere e pe maniere che ju tratìn, nancje che a fossin bestiis! Si conte che in chei timps lontans il bec nol veve ancjemò i cuars. Maridât cu le sô Beche di cualchi an, dut al procedeve benon, fin cuant che nol è stât creât il simiot, un ciert Mandrillus, personaç di no fidâsi masse, par vie de someance cul om! Elegantut, sboron e spandon, al praticave il mistîr di miedi, e al faseve un grant sucès cun dutis lis feminis dal circondari. Adiriture le femine dal Dodo, le Dode,  si ere “pierdude” daûr di lui. E no jere mai plui tornade, condanant le stirpe ae estinzion. Dal moment che le Beche si svantave simpri di jessi une che “a siore Beche nissun le pete!” une dì,chel simiot di Mandrillus al decidè di “curâle”, come che al saveve fâ nome lui: di pêl e di cuintri pêl. Chê dì, chel puar biât di un bec al torne a cjase e al cjate le femine disfate, tal jet disfat, che e fume. “Ce fâstu?” i domande. E chê: “Nie. Mal à prescrit il miedi. Al pâr che al zovi. Ma tu pluitost! Tu varessis di là a fâti viodi: cjale là po ce che ti è cressût sul cerneli!”. Robis che no si sintin plui. Ma si sa, in chê volte, il Mont al jere zovin.

di ?
#1805