#18 – Titanic
“Comandant Smith, al é alc che no mi cuadre.”
“Ce dîstu po? Al é lât dut ben par cuatri dîs, o sin su la nâf plui blasonade – e plui cjacarade – de storie, e tu vegnis a dîmi che al é alc che nol cuadre?”
“Viodial chel iceber li? Mi somee masse dongje.”
Al comandant Edward John Smith al salte un batit dal cûr, forsit doi, al glot dute la salive che nol à in bocje, al spalanche i voi e lu viôt. Chel tocon di glaç nol vares di jessi li. I seconts ch’a mancjin al impat si podin contâ sui dêts.
10 – Respire.
9 – Murdoch al à di virâ a man çampe.
8 – Motôrs indaûr.
7 – Respire.
6 – No an di coventâ ma… prontis lis sialupis?
5 – Murdoch aial capît?
4 – Respire.
3 – E je masse int su cheste nâf.
2 – La tecnologjie no covente a nuie cumò. Il destin di 2223 personis al é in mans umanis. L’impuartant al é che dut al ledi pe bande drete.
1 – No a drete, Murdoch! O vivi dite a man çampe!
ZERO. IMPAT.
Il comandant si rintane intune stanziute daûr de cabine di comant.
No si sintin rumôrs. Di là nessun si permet di tabaiâ. I rumôrs de nâf ch’e vise dal disastri a an ancjemò di vignî. E je miezegnot mancul vincj e no je masse int ator.
Edward John Smith al vierç un scansel cuntune clâf ch’al puarte simpri cun lui. Al tire fûr un regâl che i à fat un zovin todesc di disenûf agns prin di partî, un ciert Hans Riegel – cualchi an plui tart chel zovin al varès fondât une gruesse aziende, la Haribo. Smith al tire fûr un scartòs, lu vierç e… orsuts di gome! Al met un in bocje e lu guste a lunc. Il sô salustri di pâs prin dal davoi ch’al sarès vignût.
Al torne a meti il scartòs tal scansel, al conte fin al trê e al vose “Ducj ai puests par il plan d’emergjence!” e di li al é tacât l’Infier.
di ?
#1732
