CC24Lui#27 – Il re dai canguros

#27 – Il re dai canguros

Il re dai canguros si clamave Boniek e al veve cjapade la sô decision.
(O vês di savê che jenfri i canguros il re al ven sielzût no par vie ereditarie, ma par vie dal non che al puarte, plui o mancul di atrat).
I siei doi conseîrs, Caniggia e Vierchowod, no jerin par nuie dacuardi e lu visarin che al varès causât dome casins.
(O vês di savê che cui che al rive secont e tierç tal Grant Sondaç Reâl al devente conseîr dal re).
Ma Boniek al fo iremovibil, lui nol jere come i siei predecessôrs, Nicolas Cage o Coccoina, lui al voleve jessi ricuardât come un re inovatîf e plen di fantasie.
(O vês di savê che il re dai canguros al cambie ogni an e si cambie la categorie di nons di sielzi tal sondaç, l’an prime Cage al veve vinçût su Winona Rider e Mel Gibson, chel prime ancjemò Coccoina e veve par conseîrs Crystal Ball e Flik Flak).
Si che il so ordin a ducj i cangûrs al fo di metisi tal marsupi une bestie diferente di un cangurut.
(O vês di savê che il re dai canguros al pues dâ dome un sôl ordin in dut il so ream, ma a chel ordin bisugne ubidî se si vûl partecipâ al sondaç par deventâ il gnûf re dai canguros).
Podês imagjinâsi la balfuerie tra i canguros prime che e vignìs sielzude la gnove categorie di nons che e sarès stade doprade par il Grant Sondaç Reâl.
(O vês di savê che la categorie e ven sielzude cuntun sorteç e e pues jessi di ogni sorte: da lis “Dancing Songs of the 90’s” ai “Cricket players of Sri Lanka League”, fintremai a “Rare but not fatal deseases” o parfin “Typical food of the states beginning with letter Z”. Par chest, jenfri i nons sielzûts dal popul dai canguros tu cjatis di ogni).
In sumis… cui un koala, cui un vombato, ma ancje cacatuas e ornitorincos… e za cussì al jere cualchi probleme. Ma po dopo… bettonge, quokka, kookaburra, copassis (zigantis)… e parfin diaui de tasmanie, dingos e echidnas. Ducj ficjâts dentri dai marsupis.
E bon, facile di induvinâ: une sdrume di canguros ferîts e cualchidun i à lassât ancje la scusse. E dut dibant, stant che l’an dopo la categorie vignude fûr dal sorteç e fo “Municipalities of Friuli beginning with the letter N” e al jere dome un canguro che al veve lis carateristichis domandadis.
Il re dai canguros, cussì, al deventà nuiemancul che Chel di Nimis.

di No Ancjemò
#1715

1 comment