CC24Jugn#28 – No jo

#28 – No jo

No jo o ai scrite cheste storie.
No jo le ai pensade e meditade.
No jo le ai butade jù di buride, e dopo limade, justade, perfezionade, une frase a la volte, une peraule a la volte.
Parcè che cheste storie e conte di une scuvierte straordenarie, che e cambiarà par simpri no dome il mont de psicologjie, ma dute la vision de cundizion umane.
Ce che ni Freud, ni Jung, ni nissun dai lôr sucessôrs a vevin capît, al è che in plui dal Io, dal Es e dal Super-Io, te psiche dal om al esist ancje il Non-Io.
Fin cumò te ment umane si veve tignût cont dome dal Io, la part cussiente, dal Es, la part subcussiente cu lis sôs pulsions istintivis e i siei desideris, e dal Super-Io, la part che e judiche ce che al è just e sbaliât e nus permet o nus improibìs di fâ lis robis.
Ma il Non-Io, ven a stai dut ce che o varessin podût fâ o deventâ, se no vessin fatis ciertis sieltis, sì, ancje il Non-io al esist, e al à un pês te nestre vite.
Pensait a dutis lis voltis che si sês cjatâts devant di un bivi, di une “sliding door”, e a ce ande che e varès cjapât la vuestre vite se o vessis fate une sielte diferente. Par ognun di nô al esist un univiers di bivis infinît, cun infinîts Non-Io alternatîfs che a son lis versions di nô che a varessin podût esisti.
No vês di pensâ dome a decisions impuartantis, come la persone che o vês maridât o il lavôr che o vês acetât o refudât, ma ancje il colôr de machine gnove o se ai 13 di Avost dal 1997 o vevis miôr lâ a Lignan o ae sagre dal frico di Cjarpât. Cuissà se sielzint chê altre alternative nol sarès sucedût alc di fondamentâl pe vuestre vite…
I Non-Io nus vegnin a cjatâ tes gnots che no rivìn a durmî, e nus fasin dubitâ di dut ce che o vin fat fin cumò. La visite dai Non-Io e pues jessi devastante.
Freud no lu saveve, ma il so Non-Io sì. Di fat, il so Non-Io lu veve ancje scrit, ma il so Super-Io al veve brusât il manuscrit. Ma tal univiers dai bivis infinîts i manuscrits no si brusin, e al è cussì che cheste storie e je rivade fin a vôaltris.

di Muspilli
#1687