CC24Jugn#26 – Bull trick

#26 – Bull Trick

Ponzi mi dîs di meti metât dai bêçs sul Toro. Il Toro, in dì di vuê, al è un Bull, mi spieghe (sì, sì o sai o sai, i dîs jo, toro al vûl dî bull, va ben che no soi studiât, ma cualchi peraule di francês le sai ancje jo!). Chê altre metât, mi dîs, tu le metis suntun Bear (E jo chi o ai tasût, parcè che no capivi cemût che si podès meti i bêçs suntun bearç, cundut che il gno bearç, dut câs, al è ancje picinin. Ma o tachi a pensâ che o podarès gjavâ fûr i cisarons, che tant no rindin nuie), ma dopo, al pense miôr Ponzi, mi dîs che sul Bear a si podarès meti dome mieç di mieç (bon, miôr, o pensi. No ai di gjavâ fûr i cisarons) e chest altri mieç di mieç tirât indaûr o pues metilu suntun Swap. (Swap… o pensi. No ai mai fumât, ma mi rint cont che cumò ducj a fumin chê robe li. Swapano, a disin, a alore i dîs che mi va ben, che la robe mi stice e o pues ancje provâ a swapâ) sì che duncje, mi fâs, fasìn cussì alore. Firme chi, firme là, firme ca di ca. La dì dopo al ven cjase mê e mi dîs che al à fat dut. Bull and Bear and Swap. E cumò o pues stâ trancuil e gjoldimi i interès, mês par mês. (Benon, o pensi, intant che o imagjini un toro che al cor pal gno bearç bugant la sô sigarete eletroniche) e par fâ fieste, i dîs, ve ca, disnicìn chest San Denêl e vierzìn cheste damigjane di Cabernet di cinc litros. E fieste, dut câs, o vin fate. La dì dopo però Ponzi mi rive dongje dut scunît e mi dîs che pûr trop il Bear si è compuartât di Bull e cun di plui al à fat un Bull Trick e si è sbassât fin par tiere. E insome… jo no ai capît ben di dulà che al è saltât fûr chest bultric, ma o ai intivât che o ai pierdude plui di mieze licuidazion e cumò soi puar patoc. Bon, dai, i dîs al Ponzi, no bisugne avilîsi, fasìn fieste distès. O voi a cjoli une altre damigjane, chest colp di Sauvignon, e un biel salam invecjât almancul doi agns, dûr e suiât tant che un mani di scove. E cussì, simpri pensant al bultric, i spachi sul cjâf la damigjane e o tachi a dai jù cul salam fintremai che nol devente ruan tant che un rap di clinto. E paraponziponzipo! O cjanti cu la ultime legnade.

di ?
#1685

1 comment