CC24Jugn#18 – Torototele in spiete

#18 – Torototele in spiete

Il tren al passave lemit parsore de taviele inçusside dal prin scjafoiaç.
Tes carocis, i passizîrs a cirivin di parâsi metintsi a tîr des bugadis che a rivavin dai barcons vierts.
Il convoi al veve tacât a folcjâsi, biel che e tacave a fâsi sù la sdrasse di int in pîts.
Milio si strenzeve il persac parsore dai zenoi, i voi che a scrutinavin ducj chei che a montavin sul tren. Denant di lui, il puest al jere libar.
“Posso?” I domandà in chê une femine, slungjant un pît.
“No, no signurine, occupato” i rispuindè a colp il vecjut.
La siore e fasè muse maraveade, po, sustade, si invià fûr dal vagon, lassant che lis puartis si sierassin cuntun sdrondenon.
La fantate sentade plui innà e tirà sù i ocjâi dal libri. E jere montade pocjis fermadis dopo di lui e e veve viodût a refudâ la sente a un zovenut, a une mari cuntune frutine e cumò ancje a chê siore.
“Che al scusi”, i disè la zovine par furlan. “Spietial cualchidun?”.
A Milio no i parè vêr di podê sbrocâ la tension. “O spieti Golia. O miôr, chest al è il non che si sin cognossûts. O soi Milio, non in codiç Torototele”.
Viodût che la fantate no diseve nuie, al le indevant cu la storie. “Jo e Golia si sin cognossûts sul Cjars. Alpins, capissie? O ’nt vin fatis tantis, insiemi”.
“Ma cumò, dulà isal?”
“Al rive ben. Al varà ancjemò di montâ sù”
“Saial il non de stazion?”
“No.”
“Aial une foto? Tal câs o voi a cirîlu sul tren”.
“A noaltris no nus coventin fotografiis. Cuant che si viodarìn, si ricognossarìn ben”.
“Tropis voltis si sêso viodûts?”
“Dopo de vuere? Mai. Si vevin vût scrit. E je une promesse. Vuê, cincuante agns juscj di cuant che si sin saludâts. Al veve di menâmi a viodi Napule, capissie?”
La fantate e restà cidine, i voi sul libri. Cualchi ore dopo, e cjapà sù il sachepan.
“In bocje al lôf” i disè displasude.
Biel che e dismontave, e viodè un vieli montâ sù de puarte dongje.
Prime che il tren al tornàs a partî, e rivà juste a intivâ i voi di Torototele poiâsi sul gnûf rivât. Biadelore, Golia al jere rivât.

di Fuguline (Teresine la çuete)
#1778