CC24Jugn#15 – Vercingetorix

#15 – Vercingetorix

“Clamaitmi il miedi, il speziâl, il veterinari!” al disè il Gjenerâl rondolantsi sul jet e tignintsi la panze. Di trê dîs nol rivave a deliberâsi. La Vuere, massimementri chê intestine, cheste volte lu veve distirât. “Evacuazion!!!” al berlave, come se al stes dant un ordin definitîf e irevocabil! Ma nie di fâ. “Dute colpe di chel Gjal maledet!”. Al barbotave delirant cul cerneli ferbint di fiere: “O savevi che mi sarès restât sul stomi! Mai rivât a digjerì i Gjai! Mai!”
Probabilmentri il probleme dal Gjenerâl al restave il timp, plui che no la diete. Masse frêt par un usât al clip di Rome. E ancje a lis comoditâts de Capitâl. E pûr par fâ cariere bisugnave passâ prime pe perifarie.
“Al è rivât il miedi, sar Gjenerâl!” al disè il soldât che al faseve di vuardie.
“Finalmentri. E jere nome che ore!”.
A une ore no sarès bastade: le visite e fo lungje e scrupulose. A la fin il dotôr, gratantsi la barbe e mugugnant, cjalant il Gjenerâl dret in muse i disè: “Chi le soluzion e je dome che une: cheste novitât, potente e straordenarie, mai prime sperimentade, ma di sigûr efiet” e al puartà sot dai voi dal Gjenerâl une piçule cuspide a ponte: “Le medisine si clame Vergingetorix. No la si glot. Bisugne assumile par vie interne”.
Cheste fo la prognosi. Definitive.
“Mah – al pensave il Gjenerâl – a mi mi somee di jessi cjapât pal cûl”. Ma propite in chel moment e rivà la vôs de sô femine, de cusine: “Su po Caesar, disniciti. Il dado è tratto. E il brût al è pront”.
Brut di Gjal, si capìs!

di Angelo  Floramo (Torototele)
#1675

1 comment