CC24Jugn#02 – Brene Sfolmenade

#02 – Brene sfolmenade

Lu clamavin Pieri Damigjane, e za dal sorenon o dome a viodilu in muse si capive parcè… E cuant che al jere ben cjariât e sù di suste e al capitave tal cafè di mê mari, al meteve daurman ducj di bon umôr. Al bastave che cualchi client i paiàs di bevi e lui al tacave a contâ barzaletis e strambolots, ma cussì ben che tu ti pissavis intor di tant ridi.
Ma ogni biel bal ancje al stufe, specialmentri cuant che al dure masse, e cussì se lui al veve bevût fin avonde, al deventave masse tacadiç e al jere propit cence frenos. Alore mê mari, simpri cu la calmute e cun tante pazience e tentave di convincilu a tornâ a cjase; ma se cualchi client, cu la scuse che Pieri al jere cjoc, al cirive di cjoilu pal cûl, lui al cambiave muse a colp e al scomençave a ufindi, a alçâ la vôs, a cirî di fâ barufe, e in chel moment al faseve ancje pôre: par altri al jere ancje un bocon di om…

Jo e mê mari o restavin imbambinîts cuant che a une cierte ore e jentrave in cafè sô mari, e disperade e cu lis lagrimis tai voi lu preave di tornâ cjase; ma lui no i badave, no stave propit a sintîle e i diseve: – O rivi cumò, va là!
Ma cul “dai e dai”, ancje une piere cuant che i gote la aghe parsore e rive cul timp a fâi la buse, cussì il cuarp di Pieri a la fin i à presentât il cont… A planc a planc i si son sgonflâts il cuel e la muse, che nol someave nancje plui lui, e nol rivave nancje a cjacarâ ben. Ma istès no i jere passade la voie di bevi, e al jere di no crodi cuant che al veve il coragjo di presentâsi devant dal banc e ordenâ il taiut o la sgnape cul segn dal dêt…
Cence frenos fin a la fin…

Dopo al è stât ancje operât ma purtrop al è durât avonde pôc.
Cun mê mari si resonave cemût che une persone e à di rivâ a ruvinâsi la vite e chê di cui che i sta vicin cul butâsi tal bevi…
Par me la cuistion e je dovude a la mancjance di caratar, di masse fragjilitât, di mût che un nol rive a frontâ lis tantis situazions de vite cu la juste determinazion e ecuilibri, e alore si cîr alc che ti judi, che ti dedi chel “snait” che ti mancje e che ti covente. E il biel al è che purtrop l’alcul, o altris porcariis, a ti dan daurman ce che tu ur domandis: ti rindin euforic, ti gjavin inibizions, ti rindin simpatic, ti radoplin lis fuarcis, magari ti fasin fâ plui biele figure cu la morose e ti fasin passâ la pôre di sostignî l’esam a la Universitât…

Ma se dopo cheste e devente une abitudine o adiriture une dipendence, alore e je veramentri dure rivâ a tirâsile fûr, parcè che e sarà une continue lote tal cerviel che no ti lasse respîr, tu si sintis cence volontât e un torment tal cjâf che ti sburte saldo a parâ jù…
Stes discors al vâl ancje pai spagnolets e altris pestilencis che a intossein la nestre vite, e par finîle ca mi visarai simpri des peraulis cussì scletis di un gno amì che al jere rivât a smeti di fumâ: – No podevi sopuartâ che un rodolut di cjarte e cuatri fueis di tabac a fossin deventâts i parons de mê vite!

di ?
#1661