La classifiche di Març

E o sin puntuâi come i ûfs a Pasche!

La zurie e lavore di lene e i mus ancje, stant che la prime biele gnove dal mês di Març e je chê di une partecipazion totâl ae Corse, cun ducj i 31 mus che o di riff o di raff a àn presentât alc. Ancje chest mês al è sucedût di dut, ancje se i mus di competizion a àn tacât a vignî fûr.

Ma scomencìn subit cun mostrâus la classifiche di Març, che e je stade une vore, ma une vore strane, stant che i prins trê rivâts, pûr pûr cun bogns vôts, no àn ricevût un prin puest di nissun. Al vinç, ma dome in gracie dal vôt intal FCC, dulà che al rive prin in extremis, Nevio, mus che al rive di daûr, ma al comede ducj.

E compagn di lui ancje Stele Alpine e Incocalît a son doi outsider, che de basse classifiche son lâts a cjapâsi il podi, cuntun biel salt indenant. Dopo a rivin chei che a savevin di barufâsi par deventâ campion di Unvier. E lis posizions a no cambiin, Brene Sfolmenade al reste denant di ducj, ma in pratiche slungjant il mustic e un çocul. Catine la Nere, Teresine la çuete, Glorious Grene e Torototele a son li daûr, a nivei alts di narazion.

Altris dôs sorpresis di Avrîl, Atile e La Mari de Gnot Nostrane, che forsit a parin vê cjatât un ritmi plui alt.

Par concludi, doi mus a àn fat harakiri, mandant une poesie che par tant biele, no podeve jessi valutade, stant che la gare e je fate di contis. Dut câs… Poetics a son stâts sedi No ancjemò, sedi Chel d Cormons. Mieç pas fals par Muspilli e Secretariât, invezit, e ritmi costant par Glorious Grene.

E il FantaCorseCurte? Ancje ca, dut un ribalton dal secont puest in jù. Eh, sì, parcè che e je vere che si conferme prime la gjatemarangule, ma no imbroche un mis di altissime classifiche, lassantsi recuperà di Muspilli e Derna, pronts pardambon a passâi parsore al prin pas fals. E di biel al è che o vin ancje vuadagnât un 2-3 votadôrs.

Ma il moment plui spietât al è savê cui che al vinç i prins premis… ven a stâi cui che al devente CAMPIONE D’INVERNO, cui mês di Zen, Feb e Mar. Vele ca…

Al vinç il prin titul, cuntune percentuâl spaventose di gradiment, nuiemancul che Brene Sfolmenade, che al à cjapât propit la robe di sburide e al à comedât ducj che altris cu la so vene sureâl e fantasiose. Al secont puest, simpri cun percentuals altononis, Catine la Nere, mus di gale e maluserie. E al tierç puest, sorprese dal ultime tape, Torototele, sul podi dal Invier, sbregant vie la posizions di un sbit a Secretariât. A chescj prins trê i premis, che cumò l’Ostîr no si vise ce, ma al larà a viodi ce.

Ma savêso ce che al è di biel? Che in 20 ponts, in pratiche mancul di une tape, se ducj a van indevant a scrivi cussì, a son nuiemancul che 11 mus, ducj pronts a fâ la stagjon de Vierte tirant sù un polvaron.

E pal mês di Març al è dut. Anzit… no je vere, doman, a 9.,30 di matine, a Radio Onde, il vuestri Ticât dai Mus al regalarà la solite radiocroniche fûr cu la cassele e l’Ostîr al leiarâ la conte vincidore, di Nevio.