CC24Avrîl#20 – Il sburt

#20 – Il sburt

“Mi dâtu il gjornâl?”
Cun fadie o ai gjavât i voi dal gno tacuin e o ai incrosât i siei voi scûrs.
O ven in chest puest di agns, solite ore, simpri chê gulizion.
No feveli cun nissun, ma circondât da lis vôs di altris, o scrîf, o scrîf, o scrîf…
Lis camarelis son usadis a chest, e no nome lôr.
Ca, in tal gno paisut, la int mi lasse biliets o e scrîf messaçs. A stent mi indrecin la peraule.
E à di jessi une turiste. I passi “Il Gazetin” cjalant di altris bandis.
Invezit o sint che di pôc e je lade di stâ in te vecje cjase de ex bibliotecarie.

Lis notis de sô vôs si dan la volte, lant jù e sù di ton. Come se pardabon lis sôs peraulis a lessin daûr di une partidure. Jê e à cierts suns garps ma lis A e lis E plenis, viertis, distantis da lis nestris sonoritâts. Cuasi no respire par dî chel che i sburte sul cûr. Tropis robis puedie contâ une vôs? Ce ti puedie dî?
No rivi a cjalâle ancjemò. Il ros in muse si à slargjât dapardut, il cuel si à glaçât. No soi plui jo. Simpri il stes. Jo o sint come parsot un ferâl enormi e ogni gno moviment al è inzigantît e intardât.

E, po dopo, di bot chê ridade profonde, plene, come une puarte spalancade e di atrat. Non rivi a resisti. Mi volti. Le cjali.
“Al é ancje il suplement” i dîs slungjant “Oggi Motori”.

di Incocalît
#1620