CC24Avrîl#09 – Jo, me, mi

#09 – Jo, me, mi

Eh, sì! Prime o dopo al ven simpri il moment inte nestre vite dulà che un si cjate a fâsi cualchi domande “serie” e profonde, magari cuant che nus mûr cualchidun, e alore al funerâl tu sintis simpri lis stessis frasis: – Ce che o sin, eh? Murî cussì zovins… Propit chê altre matine si vin saludâts e cumò lu cjati dentri di une casse di muart – … Dut câs a la fin ognidun si fâs la sô personâl opinion su la vite, sul destin, sul “aldilà”, e naturalmentri sul Signôr.
Lassant in bande l’ûf e la gjaline, ancje jo intal timp e cu lis mês diviersis esperiencis mi soi fat une mê idee su chês robis alì, e alore cumò che o sin fra amiis us conti francamentri cemût che le pensi: jo mi viôt come un piçul grignel intal mieç dal univiers, une presince umane che e esist e e vîf insiemi a dute chê altre int ator ator pal mont. Ma ancje se o soi dome un, mi soi convinçût che ancje jo o fâs part dal dut, ancje jo o pues dî la mê, ancje jo o pues dâ il gno personâl contribût a cambiâ alc e o ai di conseguence di cjapâmi lis responsabilitâts di ce che o fâs e parfin di ce che o pensi!
Il Creatôr mi à dât “in gjestion”un cuarp materiâl, che al dure par cualchi desene di agns, ma o ai ancje une biele flamute che e art continuamentri dentri di me, che no mûr mai e che e je une piçule part di Lui, nestri Pari: vâl a dî il gno Spirt. E jo o ai capît che e je chê robe li che e conte a la fin, che bisugne alimentâle e fâle sflandorâ di plui cu lis nestris esperiencis inte vite su cheste tiere. E al è clâr che cu lis azions negativis no tu alimentis nuie, ma tu fasis dome dams, a ti e a chei altris, e il mâl che tu fâsis prin o dopo ti torne ancje indaûr…
No i crôt al Unfier, al Purgatori e al Paradîs, ma se l’obietîf finâl de nestre esistence al è chel di rivâ a zontâsi prin o dopo al nestri Creatôr, par rivâ a capî fin in font il significât di dute la storie de creazion e vie indevant, mi pâr che sedi impussibil il dovê vivi une volte sole. Ancje parcè che se un al vîf dome trê agns ce isal rivât a capî e a provâ? Il predi nus dîs che chel frut al va tal “limbo” e al spiete là il Judizi Universâl… Ma chel frut ce esperience e pussibilitât ajal vût? Cuindi jo mi soi convint che nol pues bastâ une vite sole par vê un “panorama” complet di dute la storie; difat jo o soi sigûr di vê vivût intal timp tantis “incarnazions”: di om, di femine, di siôr, di puar, di sassin, magari di vescul…
No sai cemût che e je la mê “situazion spirituâl”di cumò e se o varai di bisugne di altris “vignudis” intal mont, ma intant o vuei gjoldi la mê vite di cumò in maniere ative e positive, cui voi vierts su ce che al esist ator di me, cirint di preseâ ce che mi circonde e di ringraciâ Chel lassù par dut ce che Al à fat e Al continue a fâ, par ducj. No mi vergogni a dî che intal timp o soi rivât ancje a vê un contat mentâl cun Lui, e prin o dopo, a la Sô maniere, Lui mi rispuint…
Po ben, ogni tant al va ben ancje tabajâ di robis plui grandis di nô, ma se o vin un cerviel no si pues simpri contâ monadis, lamentâsi e porconâ. E alore a la fin de storie jo intal fratimp mi dîs: – Gjoditi la vite! E Tu, Signorut, stâmi vicin!

di Renzo Turùs (Chel di Cormons)
#1608