CC24Març#24 – Lui

#24 – Lui

La aghe dal mâr mi à simpri fat un pocje di pôre par vie de sô grandece cence misure e di dut ce che e pues platâ. Par dâi cuintri a cheste pôre al è di un pôc che o ai tacât a lâ al mâr ogni dì, di Mai a Otubar.
A buinore, tal gno pont preferît, no je mai int. Vuê il cîl al è grîs e il soreli al cuche fûr dome ogni tant. Mi met la mascare e mi buti, ignorant un sgrisul di frêt.
La aghe e je une sostance penze e vive che mi cjape dentri e mi imbombìs lis orelis cul so sunôr sort.
Mi plâs stâ sot aghe, ma mi sint ancje ospit intun puest che nol è il gno e che al podarès jessimi ostîl. Come simpri, o pari vie dal cjâf cheste angosse lizere vogant cun plui fuarce.
Un salustri subitani al travane il mâr cun rais di lûs che mi mostrin une strade verticâl. O sint di no vê ancjemò bisugne di aiar e o decît di lâi daûr a chês bielis cuardis di soreli che al è come se mi mostrassin une vie.
O tocji il fondâl cu la man cu la idee di sburtâmi in sù. In chê, mi somee di viodi une persone che mi cjale in muse. Une pôre ataviche mi cjape la panze e il gargat, e o scjampi vie come un mat.
Tornât fûr, o respiri a bocje vierte fin che no mi cuieti. Nol podeve jessi nissun là sot, e soredut no pues vê viodût nissun di chê prospetive li. La muse e vignive di sot, come se il fondâl al fos une parêt trasparente o (ancjemò piês!) un spieli. Ma il fondâl al è dome savalon, mi dîs, e e je ore di finîle di cedi a dutis chestis pôris cence fonde.
O decît di tornâ jù.
Lui mi spiete tal stes puest di prime. Al à la muse cuvierte di une mascare verde de Cressi propite come la mê. Al à ancje il me stes costum, ma come ruvinât di agns di aghe e sâl. Mi salude cu la man in maniere lente e un pôc avilide. Lu saludi a planc.
La aghe e je une sostance penze e vive che mi jemple dentri e mi imbombìs il cuarp cul so sunôr sort.

di Glorious Grene
#1591