CC24Març#22 – Vite di ominidis

#22 – Vite di ominidis

– Fruts, leit a pagjine 34 dal libri di storie. Cjapitul: GLI OMINIDI. Tobie, lei tu ce ch’al é scrit.
– I ominidis a son une famee di primitîfs dal Miocene Inferiôr. Di cheste famee a fasin part i umans e une buine part des simiis antropomorfis, comprindûts i Australopitecs.
– Graciis Tobie. Chestis a son lis informazions su la lôr classificazion. Ma cualchidun saial dimi cemût ch’a vivevin i prins oms dai landris? Cui volie alçâ la man par dî alc? Lisabete, prove tu.
– I autralopitecs a cusinavin su la stue i brontosaurs: ju taiavin a tocs e ju metevin tes pignatis bocononis ch’a tignivin tal camarin dal landri.
– Brave Lisabete. E jere propit cussì. Catine, tu ce pensistu?
– O pensi che chei oms pelôs e chês feminis pelosis, cuant ch’a barufavin no si tiravin pai cjavei, ma pai pêi, tant luncs ch’a jerin.
– Catine, tu âs induvinât, o vin tantis testimoniancis di chest. Jacum, vustu zontâ alc?
– I fruts, par me, a vevin bestiis di compagnie, come ch’o vin nô i cjans e i gjats, dome che lôr a vevin la tigre dai dincj a sable e i piçui dal mammut.
– Fruts, o sei maraveôs, no covente insegnâus nuie, o savês bielzà dut ce ch’al é di savê. O viôt ancjemò une man alçade. Dinus ce che tu pensis, Isabele.
– Mestri, o pensi che vuê buinore tu vedis fat gulizion cu la sgnape.
– O sês une classe straordenarie pardabon. Ancje Isabele e à dit une robe juste. Par vuê alore fasin fente che cheste lezion e sedi di “Contis fantastichis” e la lezion vere di storie la spostin a doman. E cumò… ricreazion in anticip. Ducj in curtîl a zuiâ di fâ fente di jessi oms e feminis dai landris, cence regulis, cun tante tante fantasie.

di Daûr la Lavagne
#1589