CC24Fevrâr#19 – La buere scure

#19 – La buere scure

Sbuf e Buf le mê vôs che e vose dal profont de mê gose, tant che il berli di un muart dal profont de sô buse. Un bruntulâ ch’al busine di buine bande. Une bombe che e rimbombe in tal Brumâl di brose. Bruìs planc, cumò. Si ferme? Buuuu. Vele che e torne, il Babau. Sdrondene sui veris, cui dêts di glace. Bat. Bat. Bat sul scûr ch’al clope e ti fâs scjampâ fûr dut il clip di bot. Un bruseghin come di briade che e blesteme. Basoâl! Balort di un Bastart. Bauc, biât di un bavôs! Babeo imbambolât jenfri la bombâs. Dismoviti! Zito, che ti strissini. Intant jê e soflete. Filuscje. Si sfante. Sêstu? Zito! Mi sintistu? Ce fâstu, duarmistu? Toc toc ti tuchi cul tintinulâ da lis sgrifis che a sgrifin sgriadis sui veris. Gruse di zulugne che ti ingrisule. Ti visistu di me? No? Pardabon? A pitinton ti visi di bot. O soi la Buere Nere. Lu sintistu il ghiti di pôre su la schene che si creve come une criùre? Cristian! O ven a cjoliti. Usgnot. I clopi rondolant jù da la cape dal camin. Ti cjapi pal copin. Coçon di un uman. Tant che il to Basavon, l’Adam, che si crodeve bulo. E cumò velu chi ch’al svole cun me su la ale da la Buere. Chê Nere. Ti studi il fûc, faliscje che si fâs setiç. Tu restis crot, puce di stiç. Ma ce pensavistu mai di jessi, tu, Uman? Dome un suspîr sù pal camin dal tet. Un sbit. Un pêt. Un rut. Ancje se vecjo pôc plui che un frut, pe pôre cul cagot. Tu peçot di un sbrendulot. Jo montane, codebuie, bissebove. Jo, par simpri Buere. Ma chê Nere.

di Torototele
#1556