CC24Fevrâr#06 – Merlot

#06 – Merlot

– Al sbivicje – dissal Filip, cjalant fûr de puarte cu la tace di neri in man. Une glutade e po: – Dipo, Bepi, vere che al sbivicjave ancje cuant che tu âs vendemât, no mo?
Cualchidun di chei che a jerin li, inte cantine di Gjino par fâi un viva! al so complean, al cirî di cambiâ discors. Ma aromai Filip al è partît. Che il vin i vûl savût a fâlu, che cussì si à di savê vuiâ lis vîts e cuinçalis e il verderam e i pampui e i raps e la vendeme e folâlu e fâlu boli e il turcli e travasâ, eh! Travasâ! I vûl une zornade nete, sute daspò di altris dôs netis e sutis, i vûl savût a fâ pulît! Se no ti ven fûr une sbivicje come cheste.
– Ti vevi dit, jo, di no invidâlu chel lì – i cibiscje a Gjino so copari Gustin.
– Lasse boli, lasse.
Filip cumò al è rivât a salmodiâ sul so vin, che nol à pôre di nissun confront, che lui lu vent pardut intes miôr cantinis, il so merlot de Azienda Agricola Tesolin Filippo.
– E la etichete? Le veso viodude la etichete? Le ai fate disegnâ di un mestri, mighe mignagnulis, che mi à costât, ma e je vignude biele, no le vês mai viodude?
– Une robe cussì? – al domande Gjno mostrant la butilie.
– Propi chê lì – al è par dî Filip. Ma la peraule i mûr sui lavris. E subit al cambie colôrs.
E je propi la butilie che Gjino i à jemplade la tace momodant.
Une biele etichete, nuie ce dî. Azienda Agricola Tesolin Filippo. Vendemmia 2022.
Gjino le mostre che ducj le viodin ben. E po, a Filip:
– Merlot. O sbivicje?

di Ippogrifo
#1543