CC24Zenâr#12 – Gjate fantate

#12 – Gjate Fantate

E tacà gjavant fûr chel prin dissen sot dal mûr (trops agns e vevie alore, ator i cuatri, cinc?). Si ricuardave propit ben: sveade cun pôre di chel brut sium cuant che la besteate e jere pronte par saltâi intor… e veve subit cjapât sù il lapis par meti in piture chel gjaton. La cjarte blancje e mostrave cuatri liniis par lis mostacjs, une taronde par la muse e une curve grandonone in ros par il larc bocjon.

“No, butâlu vie no, la maniere di pierdi plan planchin la pôre di chestis robis e je cjalâlis dret in muse. Ven chi ninine, to nono ti judarà a tacâlu tal mûr, cussì cuant che tu larâs tal jet tu ti visarâs simpri che al è un pipinot te cjarte, no chel mostrat che ti an fât crodi i monis di tiei fradis par cjapâti in zîr.”

E cul timp al jere deventât un rituâl no di pôre, ma divertent. Ogni gnûf sium dal gjat al finive intune altre piture, simpri miôr dissegnade, e dutis tacadis tal mûr fin a cuvierzilu dal dut.

Ma cumò al jere rivât il timp di cambiâ. Cumò e voleve meti altris decorazions: rockstars, zovins atôrs galants e vie indenant.

Impins sul jet e veve cjapât la ultime cjarte, chê plui adalt, ma no rivave a stacâle dal dut. Si jere butade tal jet cul telefonut par domandâ a sô mari dulà che e jere la scjalute.

Dibot, chê ultime cjarte e jere colade jù, propit parsore de sô muse. Par un marilamp si veve ricuardade la prime pôre pe besteate dal sium.

E riduçà. Cheste volte la besteate sì che e jere rivade a mangjâle, o si no jê, dal sigûr chel ultin toc di infanzie che i vanzave.

di Matungo
#1519