CC24Zenâr#11 – Letare di proteste dal Sindacât dai Cenglârs

#11 – Letare di proteste dal Sindacât dai Cenglârs

Il gno non al è: “Gramule”, e o fâs part dal sindacât di ducj i cenglârs dal Friûl. In difese de nestre categorie, tai ultims timps metude in crôs da part di dute la int, o vin decidût di protestâ, metint in clâr lis robis cun voaltris che o sês al podê.
Il fat al è che a son aromai agns che cuasi dutis lis fameis dal Friûl a àn cjapât la usance a lassâ bandonâts par dut ogni sorte di rabaldarie alimentâr e tant altri, massime cuant che a van a fâ la scampagnade o la mirinde tai boscs e tai prâts dal dulintor de nestre Regjon.
E alore cui si aie cjapade la responsabilitât di dovê tignî nete e in ordin la nature furlane se no noaltris cenglârs? No par nuie il Signôr nus à dât simpri tante fam e un bon stomit! Si che duncje, par rivâ a conservâ ben dut il teritori o vin dovût riprodusisi a biondo Dio e cussì cualchidun al è deventât ancje un pôc salvadi e in cualchi ocasion o vin parfin esagjerât cul lâ a mangjâ tes vuestris vignis, tai orts, cjamps di patatis, di forment e dut ce che di vert e di tenar si cjatavisi devant. O vin ancje lis nestris colpis, come no.
Ma dopo lis ultimis disposizions dal vuestri Governi al è saltât fûr che cumò o podês cjapâ sù la sclope e fânus fûr tic e tac, e cussì o fasarìn ancje la fin dal purcit, cun tant di sugo pe pastesute o miôr ancjemò il spezatin cu la polente!
Noaltris cenglârs, i scovacins de nature, tratâts aromai cence nissun rispiet!
E pensâ che ducj i fruts, cuant che nus viodin e sintin a vuicâ, a pensin subit che e sedi rivade la stagjon dai krampus di Tarvis, e si metin a batinus lis mans!
Però nissun al sa che il Comun di Rome nus veve parfin clamâts, simpri par sot vie, propit noaltris dal Friûl che o sin simpri cussì ben organizâts, a intervignî a la svelte sul teritori de Capitâl parcè che lôr no rivavin plui a smaltî dute la robe ingrumade pes stradis! E nissun di noaltris al à mai pretindût di jessi pajât!
Però cumò e je ancje ore di finîle di jessi tratâts come bandîts e che o fasìn dome dams!
Cussì us volìn dâ une buine idee par risolvi i vuestris problemis di scovacis: ogni Comun che nus lassi a complete disposizion un grant cjamp recintât, (sì ma fat di ciment e no di len, parcè che o sin bogns di crustâus ancje chel!), cjamp dulà che e vignarâ butade dute la cragne, i vanzons e i scartins che no us coventin plui, e o podês stâ sigûrs che ogni dì e vignarâ smaltide daurman cualsisei robe che si buti dentri ! E naturalmentri dut a gratis!
Ae fin de storie, cu la sperance di vignî scoltâts e in spiete des vuestris decisions, noaltris cenglârs us saludìn cun dignitât, ma ocjo che us tignìn di voli, e visaitsi che o stin ancje pôc a organizâ une altre marcje, magari no su Rome, ma prime però a Udin e dopo a Triest, dulà che i “ucios” no àn mai viodût un cenglâr!

Mandi mandi dal S.I.C.
Sindacât Italian Cenglârs

di Renzo Turùs (Chel di Cormons)
#1518

1 comment